Jabuli 17 - Acoli Baibul

Lega pa dano ma giuno wek Lubaŋa ogwoke

¹ Ai Rwot, winy kokona pien lokka tye atir; cik iti iwiny kokona! Winy legana, pien pe tye lok me bwola mo ma a ki i doga.

² Ibimiyo aloyo kop, pien iŋeyo kop ma tye atir.

³ Ka iŋiyo cwinya, dok ka ilima i dyewor, kadi itema, pe ibinoŋo gin marac mo tye iiya; dok pe abalo i lok ducu ma aloko,

⁴ Dok ka iniyo tic pa dano, ibinoŋo ni alubo cikki, pe alubo kit pa jo ma gin lubwami.

⁵ Kare ducu abedo ka lubo yoni, ma pe aŋak woko ki iye,

⁶ Alegi kun akok boti, ai Lubaŋa, pien ibigamo doga; cik iti bota, iwiny lok ma aloko.

⁷ Nyut mar meri ma pe lokke i yo me aura, in Lalar pa jo ma giyenyo ka larre i ciŋi yo tuŋ lacuc, pien igwokogi woko maber ki i kom lukworgi.

⁸ Gwoka macalo igwoko nyig waŋi kikome; kana i te tipo me bwomi,

⁹ ki i kom jo maraco ma giyako limma, gin lukworra ma giraco twatwal ma giruma woko dyere.

¹⁰ Cwinygi odoko tek ma kica pe makogi; lok ma giloko bene giloko ki nyatte,

¹¹ Gilubo kora; kombeddi guruma woko; guciko waŋgi me noŋo kare ma myero gireta kwede woko piny i ŋom,

¹² Lukworra calo labwor ma owor, gimito kido koma woko, ma giliba kun gikura i kabedo ka ma gukanne iye calo latin labwor.

¹³ A malo, ai Rwot, ci icirwatte ki lukworra, lweny kwedgi ci ilogi woko! Lara ki i ciŋ jo maraco ki pala lucwanni;

¹⁴ lara ki i ciŋgi ki tweroni, ai Rwot, ki i ciŋ jo ducu ma doŋ gitye ki jami ducu ma igi mito i kwo man. Wek guyeŋ ki gin ma yam ikano pigi; mi litinogi gunoŋ can muromo makato; dok myero guwek mogo odoŋ pi litinogi ma pud lukere.

¹⁵ Kit macalo an kita tye atir-ri, abineni, bedoni kweda miyo aco ki i waŋ nino ma noŋo apoŋ ki yomcwiny.