Jabuli 16 - Acoli Baibul

Lega me gen

¹ Gwoka, ai Lubaŋa, pien ariŋo alaro boti.

² Awaco bot Rwot ni. “In i rwoda; gin maber mo ma atye kwede pe, laboŋo in.”

³ Jo maleŋ ma i lobo gin jo me awora, ma giyomo cwinya mada.

⁴ Jo ma giyero lubaŋa mukene ginyayo cwercwinygi gimedo ameda; pe abionyo gityergi me remo, dok bene pe abilwoŋo nyiŋ jogigi ki doga.

⁵ Rwot aye dulla ma gipokka, en kikopo ma abimato; kwona ducu tye i ciŋi.

⁶ Waŋ apokki me potona opoto i kabedo ma yo mo cwinya; iyo, doŋ anoŋo ginaleya maber ma romma,

⁷ Apwoyo Rwot ma omiya ryeko; cwinya bene pwonya kadi ki i dyewor,

⁸ Kare ducu aŋeyo ni Rwot tye kweda: pe gibidira woko cen, pien en tye yo tuŋ ciŋa ma lacuc.

⁹ Pi meno omiyo abedo ki yomcwiny madwoŋ, nino ducu abedo maber ki kuc;

¹⁰ pien in pe ibitenya ata i lobo pa jo muto, pe ibiweko danoni ma geni donyo i bur lyel.

¹¹ In doŋ ibinyutta yo ma tera i kwo; bedoni kweda miyo abedo ki yomcwiny madwoŋ mada, i tuŋ ciŋi lacuc tye iye gin ma yomo cwiny dano nakanaka.