Jabuli 149 - Acoli Baibul

Gilwoŋo jo Icrael ni gupak Rwot

¹ Wupak Rwot! Wuwer wer manyen bot Rwot; wupake i cokke pa lwak ma gigene!

² Wun jo Icrael, cwinywu myero obed yom i kom Lubaŋa muketowu: wun jo Cion, wubed ki yomcwiny pi kabakawu!

³ Wupak nyiŋe ki myel; wugo bul ki naŋa-gu kun wupake kwede.

⁴ Pien Rwot cwinye yom i kom lwakke; en miyo deyo bot jo mamwol, miyo giloyo.

⁵ Wek jone ma gigene gugo kijira ki deyo; wek guwer wer me yomcwiny i karamagi,

⁶ Wek gudaŋŋe matek ki dwan malogo ka gipako Rwot, dok gumak pala lucwan ma lebe bit ryoryo i ciggl,

⁷ me culo kwor i kom lurok, ki dok me pwodo lwak me rok mapol,

⁸ me tweyo lukergi woko ducu ki nyor, ki me tweyo luditogi me awora woko ducu ki nyor me nyonyo,

⁹ ki me ŋolo kop i komgi kit ma yam gicoyo! Man aye deyo pi lwakke ducu ma gigene. Wupak Rwot!