Jabuli 147 - Acoli Baibul

Pako Lubaŋa Matwero-ducu

¹ Wupak Rwot! Pien wero wer me pako Lubaŋawa ber, pien en lakica, mumiyo wer me pak myero kwede,

² Rwot tye ka gero Jerucalem odoco; en coko jo Icrael ma yam giterogi i opii kelogi paco.

³ En caŋo jo ma cwinygi cwer, dok tweyo waŋ retgi woko,

⁴ En omoko wel lakalatwe woko ducu, ocako nyiŋgi woko ducu liweŋ.

⁵ Rwotwa dit, dok tek twatwal; tye ki niaŋ matut ma pe pimme.

⁶ Rwot tiŋo jo ma ginyonogi piny, ilogi malo, ci reto jo maraco gipoto woko ducu i ŋom.

⁷ Wuwer wer bot Rwot kun wumiye pwoc; wupak Lubaŋawa ki opuk agoya.

⁸ En umo polo woko ki pol, dok miyo kot cwer i lobo; en miyo lum doŋo wa i wi godi-gu.

⁹ En miyo cam bot lee tim, dok pito litino agak ma tye ka koko.

¹⁰ Tek pa aguragura pe miye yomcwiny, ki tyen dano ma laŋwec bene pe yomo cwinye;

¹¹ ento Rwot cwinye yom i kom jo ma gilwore, ki i kom jo ma geno mar mere ma pe lokke,

¹² Pak Rwot, in Jerucalem! Pak Lubaŋani, in Cion!

¹³ En aye ma gwoko dog gaŋŋi miyo cuŋ matek; en bene ma miyo gum i kom joni.

¹⁴ En miyo waŋ apokki loboni bedo ki kuc, dok miyowu kal maber mabup adada weko wuyeŋ.

¹⁵ En cwalo cikke bot lobo; lokke riŋo bino oyotoyot,

¹⁶ En cwalo pee mayom calo yer romo; dok keto bwoyo pee woko atata calo buru.

¹⁷ En bolo pee piny calo ŋinyoŋinyo cam ma poto i ŋom; aŋa ma twero cuŋ i ŋico ma en miyo?

¹⁸ En dok cwalo lokke, ci lenyo pee woko; en miyo yamone kodo, ci pii bene mol.

¹⁹ En tito lokke bot Yakobo; cikke ki gin ducu ma en ociko en tito bot jo Icrael.

²⁰ En pe obedo ka tic ki rok mo mukene kit meno; pe giŋeyo cikke ki gin ma en ociko ducu, Wupak Rwot!