Jabuli 145 - Acoli Baibul

Pak pi ber ki twero pa Rwot

¹ Abidwori ki wer, in Lubaŋana ki kabakana, dok abipako nyiŋi nakanaka.

² Abipwoyi nino ducu, dok abipako nyiŋi nakanaka,

³ Rwot dit, myero gipake twatwal, ditte pe romo titte, tere pe tatte.

⁴ Lwak me kare ducu gibipako ticci bot litinogi; gibituco tic matego ma yam itiyogi.

⁵ Abilwodo lok i kom deyo me dit me kerri, ki i kom tic me aura ma ceŋ itiyo.

⁶ Jo gibilok i kom tek me ticci ma kelo lworo bot dano-ni, ki an bene abitito pi ditti.

⁷ Gibimiyo pi berri madwoŋ ywek ŋene mada i kin dano, dok gibiwero wer ki dwan maloŋo pi porreni.

⁸ Rwot lakica dok maro dano, kiniga pe mako oyot, mar mere ma pe lokke dwoŋ,

⁹ Rwot ber bot dano ducu, dok kica make i kom gin ducu ma en oketo.

¹⁰ Ai Rwot, jami ducu ma in icweyo gibimiyi pwoc, ki joni ma geni ducu gibipaki.

¹¹ Gibiloko i kom deyo me kerri, dok gibitito pi tweroni bene,

¹² wek dano ducu guŋe pi tic matego ma in doŋ itiyo, ki deyo me dit me kerri.

¹³ Kerri en ker ma ri nakanaka, dok locci biri nakanaka i kare pa yalwak ducu. Rwot lagen i lokke ducu ma en ociko, dok bene lakica i ticce ducu ma en tiyo,

¹⁴ Rwot kwako dano ma mito poto, dok ilo joma piny obwoyogi woko ada malo.

¹⁵ Waŋ dano ducu neno boti, in aye ma iminigi cam i kare ma mitte kikome,

¹⁶ In iyabo ciŋi, ci imiyo gin makwo ducu giyeŋ.

¹⁷ Gin ducu ma Rwot tiyo tye atir, gin ma en timo ducu tiyo ki mar.

¹⁸ Rwot tye cok bot jo ducu ma kok bote, ma gikok bote ki ada.

¹⁹ En miyo jami ducu ma mitte bot jo ma lwore, dok winyo kokogi, ci larogi bene,

²⁰ Rwot, gwoko jo ducu ma mare; ento jo maraco ducu en binekogi tyekogi woko.

²¹ Abipako Rwot kare ducu; wek gin makwo ducu ma tye ki kom gupak nyiŋ Rwot nakanaka.