Jabuli 143 - Acoli Baibul

Lega pi lar ki pi telo dano

¹ Ai Rwot, winy legana; winy legana me bako dog ma akelo i nyimi! Gam doga pi genni, pien in iporre!

² Pe iŋol kop i kom laticci, pien pe tye dano mo makwo ma kite atir i nyimi.

³ Lakworra doŋ oryemo kora, oloya woko adada, omiyo abedo i colpiny calo jo ma yam doŋ guto wa con.

⁴ Pi meno cwinya doŋ ool woko, gen bene doŋ orwenyo woko ki i cwinya.

⁵ Apo i kom kare macon ma doŋ okato, ci abedo ka lwodo lok i kom gin ducu ma doŋ itiyo; gin ducu ma itiyo bino i tamma.

⁶ Aryeyo ciŋa ataŋo boti ka alego, tipona tye ki orwo me neni calo lobo mutwo woko ma pii pe iye,

⁷ Ai Rwot, gam doga oyotoyot! Cwinya mito tum woko! Pe ikanne woko ki bota, miyo abedo rom ki jo ma gicito gidonyo piny i bur.

⁸ Ageni mada; wek awiny i odiko kun ipoyo wiya i kom mar meri ma pe lokke. Pwonya ki yo ma imito ni myero alubi, pien legana ducu acwalo malo boti kunnu.

⁹ Ai Rwot, lara ki i ciŋ lukworra! An doŋ ariŋo ka larre boti,

¹⁰ Pwonya wek ati gin ma imito, pien in Lubaŋanal Wek cwiny meri maber-ri otela iyo mupirre marom!

¹¹ Lara, ai Rwot, pi deyo me nyiŋi; dok ikela woko ki i can pi porreni!

¹² I mar meri ma pe lokke pira, nek lukworra ityekgi woko, pien an abedo laticci.