Jabuli 141 - Acoli Baibul

Lega pi gwok i kom gin marac

¹ Ai Rwot, akok boti, bin bota oyotoyot do! Winy dwana ka akok boti!

² Wek legana obed i nyimi macalo odok eceta ma giwaŋo ma duny makur; ki ciŋa ma ataŋo boti-ni myero obed calo gitum ma gityero boti otyeno.

³ Ai Rwot, gwok doga, dok inen kit ma aŋamo kwede doga ka lok.

⁴ Gwoka mi pe abed ki cwiny me timo gin marac, wek pe aribbe ki jo maraco pi timo bal, wek bene pe aribbe kwedgi me camo cam mamit ma gin guyubo!

⁵ Wek dano ma kite ber aye opwoda, dok ojuka ma kica omake i koma, ento pe iwek dano mo marac owir wiya ki moo; pien legana ma atye ka legi kwede teretere-ni tye pi dag gin marac ma gin gitimo.

⁶ Ka inen gimiyogi i ciŋ dano ma myero guŋol kop i komgi, gibipwonyo atir ni lok pa Rwot kara tye ada.

⁷ Gibiketo cogogi woko ata i dog lyel, macalo got ma dano tyero iye ci tyer poto woko acacacac i lobo.

⁸ Ento an, ai Rwot, waŋa kemo boti; ayenyo kalarre boti, pe iweka ata ma pe igwoka!

⁹ Gwoka wek pe amok i owic ma guciko pira-ni, gwoka pe amok i obwo pa lutim maraco.

¹⁰ Wek jo maraco gumok i obwogi kekengi, ento mi an abwot ma pe gin mo oguda.