Jabuli 140 - Acoli Baibul

Lega pi gwoko dano ki i kom jo ma lulweny

¹ Ai Rwot; lara ki bot jo maraco, gwoka bene ki i kom jo ma gin lutim bwami,

² ma giyubo lok maraco ki i cwinygi, ci gitugo lweny teretere-ni.

³ Doggi bit calo lak twol-madoŋo, lok ma giloko obedo calo kwir pa twolororo.

⁴ Ai Rwot, gwoka ki i ciŋ jo maraco; gwoka ki i kom jo ma gin lutim bwami, ma doŋ gupiro lok me dwalo tyena wek apoti.

⁵ Jo ma nyatte guciko owicgi gukano woko pira, guciko obwo ki tol kun gimito maka kwede; i ŋet yo ducu noŋo guciko obwo tye ka kura akura.

⁶ Awaco bot Rwot ni, “In Lubaŋana.” Winy legana me bako dog, ai Rwot!

⁷ Ai Rwot Lubaŋana, lalarra matek, igwoka maber i kare me lweny.

⁸ Ai Rwot, pe myero imi bot jo maraco gin ma gimito; pe iwek tim maraco ma gupiro-ni ocobbe.

⁹ Pe iwek lukworra guloya woko, wek tim aranyi ma gimito timone odok i komgi.

¹⁰ Wek lodi mac ocorre i komgi owaŋgi woko; wek gi bolgi i bur matut, pe dok gunoŋ yo me katti woko!

¹¹ Wek jo ma giloko lok gobagoba me balo nyiŋ luwotgi pe gubed i lobo; wek gin marac omak gin lutim bwami ci ityekgi woko.

¹² Aŋeyo ni Rwot pido pilucan, dok ŋolo kop kakare pi jo ma piny obwoyogi.

¹³ Adada jo ma kitgi atir bimiyo pwoc boti; ki jo ma cwinygi atir gibibedo i nyimi.