Jabuli 14 - Acoli Baibul

Miŋo ki tim maraco pa dano ma i lobo

¹ Dano ma lamiŋ waco ki, i cwinye ni, “Lubaŋa gire pe,” Gin jo ma kitgi raco ma gitimo gin me kwer; pe tye ŋat mo ma tiyo gin maber.

² Rwot neno dano ducu kun neno piny ki i polo, me neno ka ce tye jo mogo i kingi ma gitiyo ki ryeko, ma gimito Lubaŋa.

³ Gin ducu doŋ guŋak woko, gudoko jo ma kitgi raco; pe tye ŋat mo ma tiyo gin maber, pe tye, kadi ki acel.

⁴ Gin lutim maraco-ni, pe gitye ki ŋec? Giyako lim pa jona calo gicamo kwon, ma pe bene gilwoŋo nyiŋ Rwot.

⁵ Gibibedo kunnu ki lworo madwoŋ, pien Lubaŋa tye ki jo ma kitgi atir.

⁶ Wun wumito balo yub pa lacan, ento Rwot aye ka Larrene.

⁷ Iyo, kono bedo ber ka larre pa jo Icrael bi no ki i Cion! Ka Rwot bidwoko gum bot jone, Yakobo bibedo ki yomcwiny madwoŋ, ki Icrael bene cwinye bibedo yom.