Jabuli 136 - Acoli Baibul

Wer me miyo pwoc bot Rwot

¹ Wumi pwoc bot Rwot, pien en ber; mar mere ma pe lokke bedo nakanaka.

² Wumi pwoc bot Lubaŋa ma loyo lwak lubaŋa-gu ducu, pien mar mere ma pe lokke bedo nakanaka.

³ Wumi pwoc bot Rwot ma loyo rwodi ducu, pien mar mere ma pe lokke bedo nakanaka.

⁴ En keken aye ma tiyo ginaura madito, pien mar mere ma pe lokke bedo nakanaka.

⁵ En oketo polo ‘ki ryekone, pien mar mere ma pe lokke bedo nakanaka.

⁶ En bene ma opeto lobo i wi pii matut, pien mar mere ma pe lokke bedo nakanaka.

⁷ En muketo gin madito ma ryeny ma menyo piny, pien mar mere ma pe lokke bedo nakanaka.

⁸ Oketo ceŋ me loyo dyeceŋ, pien mar mere ma pe lokke bedonakanaka.

⁹ Oketo dwe ki lakalatwe me loyo dyewor, pien mar mere ma pe lokke bedo nakanaka.

¹⁰ Oneko litino kayo pa jo Ejipt ma co woko ducu, pien mar mere ma pe lokke bedo nakanaka.

¹¹ Ci okwanyo jo Icrael okelogi woko ki i kin jo Ejipt, pien mar mere ma pe lokke bedo nakanaka.

¹² Okelogi woko pi twero me bade ki ciŋe ma oryeyo, pien mar mere ma pe lokke bedo nakanaka.

¹³ Opoko i Nam Makwar woko aryo i dyere, pien mar mere ma pe lokke bedo nakanaka;

¹⁴ ci omiyo jo Icrael gukato ki i dyere wa loka tuŋcel, pien mar mere ma pe lokke bedo nakanaka.

¹⁵ Ento omiyo Parao kacel ki dul monnye gumwony guto wok i Nam Makwar, pien mar mere ma pe lokke bedo nakanaka.

¹⁶ En mutelo lwakke i dye tim, pien mar mere ma pe lokke bedo nakanaka.

¹⁷ Oneko luker madito woko ducu, pien mar mere ma pe lokke bedo nakanaka;

¹⁸ oneko wa luker ma guywek-gu woko mapol; pien mar mere ma pe lokke bedo nakanaka.

¹⁹ Oneko Cikon, ma kabaka pa jo Amor, pien mar mere ma pe lokke bedo nakanaka;

²⁰ oneko bene Og, kabaka me Bacan, pien mar mere ma pe lokke bedo nakanaka.

²¹ Omiyo lobogi woko bot lwakke me bedo gipinygi, pien mar mere ma pe lokke bedo nakanaka;

²² omiyo bot luticce jo Icrael obed ginaleyagi, pien mar mere ma pe lokke bedo nakanaka.

²³ En opo piwa i kare ma doŋ giloyowa woko marac, pien mar mere ma pe lokke bedo nakanaka;

²⁴ ci olarowa ki i ciŋ lumerokwa, pien mar mere ma pe lokke bedo nakanaka.

²⁵ En miyo cam bot gin makwo ducu, pien mar mere ma pe lokke bedo nakanaka.

²⁶ Wumi pwoc bot Lubaŋa me polo, pien mar mere ma pe lokke bedo nakanaka.