Jabuli 135 - Acoli Baibul

Wer me pako Rwot

¹ Wupak Rwot! Wupak nyiŋ Rwot, wun luticce ducu,

² wun ma wucuŋ i ot pa Rwot, i dyekal me ot pa Lubaŋawa!

³ Wupak Rwot, pien en ber; wuwer wer me pako nyiŋe, pien en lakica.

⁴ Rwot oyero Yakobo me bedo mere, ki jo Icrael me bedo lwakke kikome.

⁵ Aŋeyo pira kena ni Rwot dit, dok aŋeyo ni Rwotwa loyo lwak cal lubaŋa ducu.

⁶ Gin mo keken ma Rwot mito en tiyo, i polo ki i wi lobo, i nam kadi i pii matut ma tye piny i te lobo.

⁷ En aye ma miyo pol tiŋŋe malo ki i agikki me lobo, en ma miyo lutkot wil, en bene ma cwalo yamo ki i odine me kano jami, ci kodo.

⁸ En aye ma yam oneko litino kayo pa jo Ejipt woko, litino kayo pa dano ki pa lee.

⁹ En otiyo lwak taŋo ki gin-aura mapol i Ejipt, kun pwodo Parao ki luticce ducu.

¹⁰ Dok oneko lwak me rok mapol, ci oneko luker matego woko liweŋ,

¹¹ Cikon, kabaka pa jo Amor, ki Og, kabaka me Bacan, ki luker ducu ma tye i Kanaan.

¹² Omiyo lobogi woko me bedo gipiny, gipiny pa lwakke jo Icrael.

¹³ Ai Rwot, nyiŋi bedo nakanaka, dok bene gibipo piri i kare pa yalwak ducu.

¹⁴ Rwot bimiyo jone loyo kop, kica bimake i kom luticce.

¹⁵ Cal lubaŋa pa lurok gitiyogi ki ryal ki jabu; man obedo tic ma dano gutiyo ki ciŋgi,

¹⁶ Doggi tye, ento pe giloko, waŋgi bene tye, ento pe gitwero neno piny.

¹⁷ Itgi tye, ento pe gitwero winyo lok, yamo me yweyo bene pe i doggi.

¹⁸ Jo mutiyo cal lubaŋa magi bene girom aroma kwedgi, ki jo ducu ma geno cal lubaŋa magi bene gitye kit meno.

¹⁹ Wun jo Icrael, wupak Rwot! Wun jo me ot pa Aron bene wupak Rwot!

²⁰ Wun jo me ot pa Levi, wupak Rwot! Wun bene ma wulworo Rwot, wupake!

²¹ Gipwo Rwot ki i Cion, en ma bedo i Jerucalem! Wupak Rwot!