Jabuli 132 - Acoli Baibul

Lega pi miyo gum kom kabedo maleŋ

¹ Ai Rwot, po pi Daudi, ki pi can ducu bene ma yam en ociro;

² ki kit macalo yam en okwoŋo kwede kwoŋ bot Rwot, ma okwono bot en ŋat Matek pa Yakobo ni,

³ “Pe abidonyo i oda, nyo kadi me ito i wi kitandana;

⁴ nino bene pe bimako waŋa, dok pe abimiyo waŋa,

⁵ nio ka anoŋo kabedo pi Rwot, kabedo ma en ŋat Matek pa Yakobo twero bedo iye.”

⁶ Nen, wawinyo pire ki i Eprata, wanoŋo tye i potti me Jaar.

⁷ “Wucitu ka ma en bedo iye, wek wawore i nyim komkerre!”

⁸ Ai Rwot, a icit i kabedoni me yweyo, kacel ki canduk me tweroni.

⁹ Wek ajwagini gurukke ki kit ma atir, wek joni ma gigeni gudaŋŋe ki yomcwiny.

¹⁰ Pe myero ikwer kabaka ma in aye yam iyero ka giwiro, ento par pi laticci Daudi.

¹¹ Rwot okwoŋo kwoŋ me ada bot Daudi, ma en pe dok biloko, ni. “Abiketo latin awobi acel ki i kin awobeni bedo kabaka, en bibedo ka loc ki i neyi,

¹² Ka likwayu ducu gibigwoko gicikkena ki ada ki lok me caden ma apwonyogi kwede, ci a biketo litiilogi bene bedo i wi komkerri, gibibedo ka loc nakanaka.”

¹³ Pien Rwot doŋ oyero Cion; en mito ni obed pacone ka ma ebibedo iye.

¹⁴ “Man aye kabedo me-yweyona ma abibedo iye matwal; abibedo kany, pien doŋ amito.

¹⁵ Abimiyo gum i kom Cion ci noŋo cam mabup; dok abimiyo lucan ducu ma bedo iye giyeŋ ki kwon.

¹⁶ Abimiyo ajwagine giruko lar, ki jone ma geno Rwot gibidaŋŋbe ki yomcwiny.

¹⁷ Abiyero ŋat mo acel ki i kom likwayo pa Daudi me bedo kabaka; doŋ atyeko yubo mac tara pi danona ma giwiro.

¹⁸ Abimiyo lewic umo lukworre woko limuk, ento en keken aye kerre bibedo maber dok bikelo, kuc bot lwakke.”