Jabuli 12 - Acoli Baibul

Lega pi kony i kom jo maraco

¹ Konya, ai Rwot, pien ŋat mo maber ma geni doŋ pe; pien jo ma lugen doŋ guto gurwenyo woko ki i kin dano.

² Dano acel acel loko lok goba bot lawote, ma noŋo lok ma a ki i doggi mit ata ento cwinygi opokke woko dul aryo.

³ Rwot, myero ijuk lok me bitagi-ni woko, en lok ma a ki i doggi me nyatte-ni!

⁴ Gin giwacci, “Wabiloyo lok ki lebwa, wabiloko gin ducu kit macalo wamito, pien pe tye ŋat mo ma en ladit ma loyowa.”

⁵ “Ento kombeddi abibino,” Rwot ma owaco, “pien doŋ giyako jami pa lucan woko, dok jo ma piny obwoyogi gitye ka cur acura ki arem. Abigwokogikit ma gimito-ni.”

⁶ Lok pa Rwot ma en ciko ber, gitwero genone, obedo calo ryal ma giliyo maber ki mac piny i ŋom, ma giliyo tyen abiro kulu.

⁷ Gwoka maber kare ducu, ai Rwot, gwokwa ki i kom yalwak me kare man.

⁸ Jo maraco gitye ka wirre i kabedo ducu giyenyo dano, kit macalo dano ducu pako kwede tim marac ma gitiyo i kin dano ma i lobo.