Jabuli 118 - Acoli Baibul

Lega me pwoc pi loyo lweny

¹ Wumi pwoc bot Rwot, pien en ber, mar mere ma pe lokke bedo nakanaka!

² Jo Icrael myero guwacci, “Mar mere ma pe lokke bedo nakanaka.”

³ Jo me ot pa Aron myero guwacci, “Mar mere ma pe lokke bedo nakanaka.”

⁴ Jo ma lworo Rwot bene myero guwacci, “Mar mere ma pe lokke bedo nakanaka.”

⁵ Akok bot Rwot ki i can; Rwot ogamo legana ci ogonya woko.

⁶ Rwot tye kweda, pe abilworo gin mo. Dano kono twero timo gin aŋo bota?

⁷ Rwot tye kweda, en aye ma konya. Abineno jo ma daga ki wan me loc.

⁸ Riŋo ka larre bot Rwot ber kato geno dano.

⁹ Rino ka larre bot Rwot ber kato geno rwodi.

¹⁰ Rok ducu onoŋo oruina woko dyere, ento atyekogi woko ducu i nyiŋ Rwot!

¹¹ Guruma woko dyere, guruma woko dyere i kabedo ducu; ento atyekogi woko ducu i nyiŋ Rwot!

¹² Guruma woko dyere calo nyig kic, gubino i koma oyotoyot macalo mac ma waŋo tim, ento atyekogi woko ducu i nyiŋ Rwot!

¹³ Gucora ‘matek ma onoŋo doŋ acok poto, ento Rwot okonya.

¹⁴ Rwot aye tekka ma apako ki wer, en doŋ odoko lalarra.

¹⁵ Wuwiny wer ma giwero me loc i kema pa jo ma kitgi atir: “Ciŋ Rwot ma lacuc lwenyo lweny matek!

¹⁶ Twerone omiyo waloyo, twerone matek i lweny-nyi!”

¹⁷ Pe abito, ento abibedo kwo, kun atito pi gin ma Rwot doŋ otiyo,

¹⁸ Rwot doŋ opwoda marac twatwal, e nto pe oneka woko gire.

¹⁹ Yabba doggaŋ me kit ma atir, wek adony ki iye, ci ami pwoc bot Rwot.

²⁰ Man aye doggaŋ pa Rwot, jo ma kitgi atir gibidonyo ki iye.

²¹ Apwoyi pien doŋ igamo legana, doŋ idoko lalarra.

²² Got ma lugedo gukwero, en aye odoko got madit me twok ot.

²³ Man Rwot aye mutimo, obedo botwa lok me aura.

²⁴ Man aye nino ma Rwot omiyo botwa; wakweru nino man ki yomcwiny madwoŋ.

²⁵ Ai Rwot, walegi, ilarwa! Rwot walegi, mi ticwa ducu ocobbe kakare!

²⁶ Lubaŋa omi gum i kom ŋat ma bino i nyiŋ Rwot! Walamo gum i komwu ki i ot pa Rwot.

²⁷ Rwot aye Lubaŋa en doŋ omiyo piny odoko leŋ botwa. Wumak jaŋ yat wuwot kwede ma wurye i tyeŋ, wuwot wurum kwede keno tyer,

²⁸ Abimiyo pwoc boti, pien in Lubaŋana; dok abidwori bene.

²⁹ Wumi pwoc bot Rwot, pien en ber, mar mere ma pe lokke bedo nakanaka!