Jabuli 116 - Acoli Baibul

Dano ma gilaro ki i to pako Lubaŋa

¹ Amaro Rwot, pien en owinyo kokona; en owinyo dwana kacel ki legana me bako dog ma alege kwede.

² Kit macalo en ociko ite me winyo legana-ni, pi meno abibedo ka kok bote nino ki nino pi kare me kwona ducu.

³ To ociko owicce oruma kwede woko dyere, arem me lyel bene otwene woko i koma likiŋ; abedo ki can dok ki remcwiny madwoŋ.

⁴ Cutcut akok bot Rwot ni, “Ai Rwot, alegi, Lara do!”

⁵ Rwot lakica dok oporre; Lubaŋawa latim kica.

⁶ Rwot gwoko jo ma kwiya piny; kare ma gidiya woko piny, en olara.

⁷ In tipona, bed ki gen, pien Rwot doŋ otyeko nyuto bene bota.

⁸ Rwot olara ki i to; ojuko pig waŋa woko, dok ogwoka omiyo tyena pe ogwaŋŋe atata.

⁹ Atye ka wot i nyim Rwot i lobo pa jo makwo.

¹⁰ Amedde ki ye en, kadi onoŋo awacci, “Can doŋ oketo koma woko”,

¹¹ ki i kare ma onoŋo abedo ki lworo ma awacci, “Dano ducu pe genne.”

¹² Abimiyo gin aŋo bot Rwot pi gin maber ducu ma en otiyo pira?

¹³ Abitiŋo gityer amata i kikopo akelo bot Rwot, abipwoye kun alwoŋo nyiŋe, pien olara.

¹⁴ Abicobo kwoŋ ma yam akwoŋo bot Rwot, i nyim lwakke ducu ka ma gucokke iye.

¹⁵ Ka ŋat acel ki i kin jo ma geno Rwot oto cwero cwiny Rwot mada.

¹⁶ Ai Rwot, an laticci; an laticci, ma latin pa aŋecani, In doŋ ityeko gonyo nyor ma gitweya kwede woko.

¹⁷ Abityero boti gitum me pwoc dok abikok boti kare ducu.

¹⁸ Abicobo kwoŋ ma yam akwoŋo bot Rwot, i nyim lwakke ducu ka ma gucokke ‘iye,

¹⁹ i dyakal me ot pa Rwot, i Jerucalem. Wupak Rwot.