Jabuli 115 - Acoli Baibul

Lubaŋa acel me ada

¹ Deyo obed boti keken, ai Rwot, ento pe obed botwa, pi mar meri ma pe lokke kacel ki adani.

² Piŋo lurok myero gupenywa ni, “Lubaŋawu tye kwene?”

³ Lubaŋawa tye i polo, en tiyo gin ma cwinye mito.

⁴ Cal lubaŋagi gitiyo ki ryal dok ki jabu; meno gin ma dano gutiyo ki ciŋgi,

⁵ Doggi tye, ento pe gitwero lok, waŋgi bene tye, ento pe gitwero neno piny.

⁶ Itgi tye, ento pe gitwero winyo lok, umgi tye, ento pe gitwero ŋweyo piny.

⁷ Ciŋgi tye, ento pe gitwero mulo piny, tyengi bene tye ento pe gitwero wot; dok pe tye gin mo ma twero winnye ki i dwangi.

⁸ Jo ma gitiyo cal lubaŋa magi girom aroma kwedgi, ki jo ducu ma geno cal lubaŋa magi bene gitye kit meno.

⁹ Wun jo Icrael, wugen Rwot! En aye ma konyowu dok gwokowu.

¹⁰ Wun jo me ot pa Aron bene wugen Rwot! En aye ma konyowu dok gwokowu.

¹¹ Wun jo ma wulworo Rwot, wugen Rwot! En aye ma konyowu dok gwokowu.

¹² Rwot pud po i komwa dok bimiyowa gum; en bimiyo gum bot jo Icrael, ki bot jo me ot pa Aron ducu.

¹³ Rwot bimiyo gum bot jo ducu ma gilwore, bot jo matino ki bot jo madito ducu maromrom.

¹⁴ Rwot omed litino botwu, wun kacel ki likwayowu,

¹⁵ Rwot myero omiwu gum, en muketo polo ki lobo!

¹⁶ Polo obedo jami pa Rwot kene, ento omiyo lobo bot dano, ni gubed iye.

¹⁷ Jo muto pe gipako Rwot, kadi bed wa ŋat ma donyo piny ka ma piny oliŋ mot bene pe pako Rwot.

¹⁸ Ento wan jo makwo wabimiyo pwocwa bot Rwot nia tin nio nino ma pe tum. Wupak Rwot!