Jabuli 113 - Acoli Baibul

Pak pi ber pa Rwot

¹ Wupak Rwot! Wun lutic pa Rwot wupake, wupak nyiŋ Rwot!

² Gipak nyiŋ Rwot nakanaka nia tin nio nino ma pe tum!

³ Cakke wokceŋ nio kwede yo tuŋ potoceŋ myero gipak nyiŋ Rwot!

⁴ Rwot tye malo i wi rok ducu, ki deyone bene tye malo okato polo woko.

⁵ Aŋa ma calo Rwot Lubaŋawa, ma bedo i kabedone ma tye malo,

⁶ ma kulle neno piny ka mabor ki kunnu, ma neno polo ki lobo?

⁷ En ilo lucan malo nia ki i apwa, dok tiŋo jo ma piny obwoyogi kwanyogi woko ki i wi odur,

⁸ ci miyo gibedo kacel ki rwodi, ma gin aye rwodi pa lwakke.

⁹ En miyo paco bot dako ma lalur, dok miyo noŋo litino ci doŋ bedo ki yomcwiny madwoŋ. Wupak Rwot!