Jabuli 111 - Acoli Baibul

Pak pi tic me aura ma Rwot otiyo

¹ Wupak Rwot. Abimiyo pwoc bot Rwot ki cwinya ducu, i dul pa jo ma cwinygi atir, i dye lwak ma gucokke.

² Tic ma Rwot tiyo dito dok me aura mada; jo ducu ma ticce yomo cwinygi giketo cwinygi twatwal me niaŋ iye.

³ Gin ducu ma en tiyo opoŋ ki deyo dok ki tek; dok porre mere bedo nakanaka,

⁴ En pe weko wiwa wil i kom ticce me aura ma en otiyo; Rwot ber dok lakica.

⁵ En miyo cam bot jo ma lwore; wiye bene po twatwal i kom gicikkene.

⁶ En onyuto twero me ticce bot lwakke, omiyogi lobo pa lurok wek gucam obed megi.

⁷ Tic ma en tiyo ducu obedo me ada dok tye atir, cikke ducu tye iye gen madwoŋ,

⁸ Gimoko matwal dok giri nakanaka, ma myero gilubgi ki ada dok ki cwiny ma atir.

⁹ En okelo lar bot jone, dok oketo gicikkene kwedgi me bedo matwal. En leŋ dok myero gilwore!

¹⁰ Lworo Rwot aye acakki me ryeko, doŋ jo ma lubo gin ma en ociko gibedo ki niaŋ maber. Dano gibipake nakanaka!