Jabuli 109 - Acoli Baibul

Koko pa dano ma tye ki can

¹ Apaki, ai Lubaŋa, pe iliŋ mot!

² Jo maraco ki lugoba gubino ka lweny i koma, kun giloko lok goba keken i koma.

³ Gimiya cwercwiny pi lok maraco me adagadaga ma giloko i koma, gilwenyo i koma noŋo ma pe abalo gin mo.

⁴ Gidota adota kadi bed amarogi, kadi wa i kare ma noŋo atye ka lego pigi.

⁵ Gitimo gin marac i koma pi gin maber ma atiyo botgi, dok gidaga kadi bed amarogi.

⁶ Yer dano marac wek opidkwede; wek ŋat mo i kin lukworre odote koŋ giteme.

⁷ Myero giteme ci ginoŋ bal i kome; dok legane bene gikwan macalo bal ma en otimo!

⁸ Gijwik nino me kwone woko obed manok, wek dano mukene aye obile jamine!

⁹ Litinone gudok litino kic, ki dakone bene odok daa-to

¹⁰ Wek litinone gubed lumalgan ma gilak ata kun gibedo ka lego jami alega; myero giryemgi woko bene ki i wi obur ka ma onoŋo gibedo iye!

¹¹ Won banya ma en yam odeno banya bote myero okwany jamine woko ducu ma etye kwede, dok dano ata-gu myero guyak jamine ma en olimogi ki tic matek-ki.

¹² Ŋat mo myero pe otim kica bote wacel, dok dano bene pe myero kica omake i kom litino kicce.

¹³ Wek likwaye ducu guto woko, wek nyiŋe bene dano pe gupo pire i kare pa yalwak ma bilubo.

¹⁴ Rwot opo i kom bal pa kwarone, dok pe ojwa bal pa minne woko wacel.

¹⁵ Wek Rwot opo i kom balgi teretere, ento dano myero pe opo i komgi matwal i lobo kany.

¹⁶ Pien dano meno pe otamo me bedo lakica, ento obedo ka ryemo kor lucan ki jo ma piny obwoyogi, ki jo ma cwinygi cwer ducu nio ka onekogi woko.

¹⁷ Onoŋo en maro loko lok me ceno dano; wek lok me ceno danone-ni odok i wiye! En onoŋo dag lamo gum; pi meno ŋat mo pe myero olam gumi kome.

¹⁸ Onoŋo lok me ceno dano odoko calo koti ma en ruko; wek doŋ obid kome woko macalo pii, dok macalo moo ma mido i cogone!

¹⁹ Wek obed calo boŋo ma en odwalo ikome; obed calo del pyer ma nino ducu en tweyo i pyere!

²⁰ Man aye myero obed kit pwod ma Rwot pwodo ki jo ma dota, gin jo ma loko lok maraco ma gimito rwenyo kwona woko!

²¹ Ento in, ai Rwot Lubaŋana, konya pi deyo me nyiŋi, dok ilara-pi mar meri ma pe lokke maber-ri!

²² An lacan, piny obwoya woko, cwinya bedo ka ton atona keken.

²³ Arwenyo woko calo tipo me otyeno; yamo kola woko macalo tero bonyo.

²⁴ Pi ri kec pi kare malac omiyo coŋa doŋ odoko nyap; omiyo bene amok woko adoko goro.

²⁵ Adoko doŋ ginaŋala pa jo ma gidota; ka gunena, ci giyeŋo wigi ayeŋa.

²⁶ Konya, ai Rwot Lubaŋana; lara pi mar meri ma pe lokke!

²⁷ Wek lukworra guŋe ni, in aye ma ilare an, ai Rwot!

²⁸ Wek gin gucen dano, ento in imiya meri gum. Wek alee otwod jo ma lewnyc i koma-ni woko, ci an laticci abed ma cwinya yom.

²⁹ Wek jo ma dota gulim can; wek lewic oumgi woko calo guruko boŋo.

³⁰ Abimiyo pwoc bot Rwot ki dwan maloŋo; abipake i dye lwakke ka ma gucokke iye.

³¹ En cuŋ yo tuŋ lacuc i ŋet jo ma piny obwoyogi, pi Larogi ki i cin jo ma ŋolo kop me to i wigi.