Jabuli 107 - Acoli Baibul

BUK ME ABIC Pwoc ki pak pi ber pa Lubaŋa

¹ Wumi pwoc bot Rwot, pien en ber; mar mere ma pe lokke bedo nakanaka!

² Wek jo ma Rwot okokogi guwac kumeno, gin jo ma en okokogi ki i can,

³ kun okwanyogi ki i lobo pa lurok odwokogi cen i lobogi, ma ocokogi ki yo tuŋ wokceŋ ki yo tuŋ potoceŋ, ki yo tuŋ acam ki yo tuŋ acuc.

⁴ Jo mogo gubedo ka lak ata i tim aroo, pe gumedo ki noŋo yo ma cito i gaŋ ka ma myero gubed iye;

⁵ kec ki orwo pii onekogi matek, omiyo gen ducu orwenyo woko ki i cwinygi.

⁶ I kare ma gitye ki can gukok bot Rwot, ci en olarogi ki i can megi.

⁷ Otelogi guwoto ki yo matir, nio ka guo wa i gaŋ ka ma myero gubed iye,

⁸ Myero gupwo Rwot pi mar mere ma pe lokke, ki pi tic me aura ma en otiyo pi dano!

⁹ En miyo jo ma orwo pii nekogi giyeŋ, ki jo ma kec nekogi bene en miyo giyeŋ ki jami mabeco.

¹⁰ Jo mogo gubedo i mutu ki colpiny, lumabuc ma gitweyo ki nyor ma gitye ka winyo arem madwoŋ,

¹¹ pien gujemo woko pe gulubo lok ma Lubaŋa ocikogi kwede, dok gukwero pwony pa En Mamalo Twal.

¹² Cwinygi ool woko pi tic matek ma gubedo ka tiyone; gupoto piny, ci onoŋo ŋat mo pe ma myero okonygi,

¹³ I kare ma gitye ki can gukok bot Rwot, ci en olarogi ki i cangi.

¹⁴ Okwanyogi okelogi woko ki i mutu ki colpiny, ka ocodo nyor ma gitweyogi kwede woko lirwatrwat.

¹⁵ Myero gupwo Rwot pi mar mere ma pe lokke, ki pi tic me aura ma en otiyo pi dano.

¹⁶ Oturo kika mola woko ducu, oŋolo rii nyonyo me cego doggola opoko iye woko i dul aryo.

¹⁷ Jo mogo komgi obedo lit pi balgi, gubedo ki can madwoŋ pi gin maraco ma gutimo.

¹⁸ Gubedo ka kwero kit cam ducu; onoŋo doŋ gicok to.

¹⁹ I kare ma gitye ki can gukok bot Rwot, ci en olarogi ki i cangi.

²⁰ Ocaŋogi ki lok ma en oloko aloka keken, ci olarogi ki i to.

²¹ Myero gupwo Rwot pi mar mere ma pe lokke, ki pi tic me aura ma en otiyo pi dano.

²² Myero gupwoye kun gityero gityer me pwoc, dok gutit pi tic ma en otiyo kun giwero wer me yomcwiny!

²³ jo mogo guwoto ki mel i dye nam, ginjo ma ticgi terogi i nam madoŋo.

²⁴ Guneno gin ma Rwot twero tiyone, ticce me aura ma en tiyo i nam madoŋo-gu.

²⁵ En oloko, ci yamo matek okodo, omiyo pii me nam otwagge.

²⁶ Omiyo mel gutiŋŋe malo ma gicok gudo polo, ka dok gudwogo piny gumwony woko ka matut i te nam; tekcwinygi orwenyo woko i can marom-meno.

²⁷ Gucatte kun gipaŋŋe apaŋa macalo lumero koŋo, ma ryeko otum woko liweŋ ki i wigi.

²⁸ I kare ma gitye ki can gukok bot Rwot, ci en olarogi ki i cangi.

²⁹ Ojuko yamo matek ci nam opye mot, ki biamwonyi me nam ducu oliŋ woko mot.

³⁰ Cwinygi obedo yom pi piny ma oliŋ woko mot litik; en okelogi bene wa i waŋ wat ka ma gimito bino iye, ki lobo ma tar atara ligwek doko waŋ it ma gunnye.

³¹ Myero gupwo Rwot pi mar mere ma pe lokke, ki pi tic me aura ma en otiyo pi dano.

³² Myero gudwore i cokke pa lwak, kun gipake bene i gurre pa ludito.

³³ En loko kulu-gu ducu doko tim aroo mutwo, dok en juko waŋ it-gu woko ducu, pii doŋ pe mol ki iye,

³⁴ loko lobo mulony doko lobo mubedo kado ma konnye doŋ pe; man timme pi bal pa jo ma bedo i lobo meno,

³⁵ En loko tim aroo mutwo doko ka ma pii poŋ iye,

³⁶ En miyo jo ma kec nekogi gibedo kunnu, ci gigero gaŋ ma myero gibed iye;

³⁷ gicoyo kodi i potti, gipito olok bene, camgi cek mabup.

³⁸ Ginya gidoko mapol pi gum ma Rwot omiyo botgi; en pe weko wel dyaŋigi dok piny.

³⁹ I kare ma giloyogi, ma gileyo wigi kun giunogi, giyelogi, ma gimiyo cwinygi bene cwer,

⁴⁰ en cayo rwodi ma unogi, miyo giwoto i dye tim ata ka ma yo pe iye.

⁴¹ Ento en laro jo ma piny obwoyogi ki i cangi, ci medo wel pa jo me odigi macalo lwak romi,

⁴² Jo ma cwinygi atir gineno ci gibedo ki yomcwiny; jo maraco ducu gijuko lok woko ki i doggi giliŋ litik.

⁴³ Jo maryek myero gubed ka tamo pi jami magi matut ki i cwinygi, wek dano opar pi mar pa Rwot ma pe lokke.