Jabuli 106 - Acoli Baibul

Ber pa Lubaŋa bot jone

¹ Wupak Rwot! Wumi pwoc bot Rwot, pien en ber; Mar mere ma pe lokke bedo nakanaka!

² Aŋa ma twero tito pi tic madito matek ma Rwot otiyo, dok aŋa ma twero pako en muromo maber?

³ Jo ma ŋolo kop atir tye ki yomcwiny, jo ma tiyo gin ma tye atir kare ducu!

⁴ Ai Rwot, po pira ka inyuto kicani bot lwakki; konya, bene, ka ibilarogi;

⁵ wek anen kit ma joni ma iyero gibibedo kwede maber, ci anywak bedo ki yomcwiny kacel ki rokki, wek awakke kacel ki joni ma gin aye gipinnyi,

⁶ Wan kacel ki kwarowa ducu watyeko timo bal; wan watyeko timo roc, watimo gin maraco adada.

⁷ Kwarowa pe gutamo pi tic meri me aura ma yam itiyo botgi, i kare ma gitye i Ejipt: pe gupo i kom bup me mar meri ma pe lokke, ento gujemo woko i kom En Mamalo Twal i dog Nam Makwar.

⁸ Ento en pud olarogi aye pi nyiŋe, wek emi twerone madit onene.

⁹ Ojuko Nam Makwar, ci nam otwo wokot otelo wigi i dye nam matut calo gitye ka wot i dye tim mutwo.

¹⁰ Olarogi ki i ciŋ lukworgi, olarogi ki i twero pa lumerokgi.

¹¹ Pii omwonyo’ lumerokgi woko liweŋ; ŋat mo acel i kingi pe odoŋ.

¹² Lacen lwak guye lokke; guwero wer bene me pake.

¹³ Ento wigi owil woko oyotoyot i kom tic ma en otiyo, gubedo ka tic ma pe doŋ gukuro ryeko ma a ki bote.

¹⁴ Cwinygi opukke pi camo riŋo i dye tim, gutemo i Lubaŋa i tim aroo.

¹⁵ En omiyogi gin ma gupenye pire, ento ocwalo kit two marac ma balo kom dano i komgi.

¹⁶ I kare ma nyeko omakogi i kom Moses, ki i kom Aron ma en ŋat maleŋ ma Rwot oyero,

¹⁷ ci lobo obar omwonyo Datan woko, ka oumo lwak pa Abiram woko bene.

¹⁸ Mac oturo ki lyel i wi lwakgi; ci leb mac ma lyel-l i owano jo maraco woko ducu.

¹⁹ Gucweyo cal-latin twon i Koreb, ci gubedo ka woro cal jabu ma guliyo-ni.

²⁰ Guloko deyo pa Lubaŋa woko, guwilo ki deyo pa cal twon dyaŋ ma camo lum.

²¹ Wigi owil woko i kom Lubaŋa Lalargi, ma yam otiyo gin me aura madito i lobo Ejipt;

²² pe gupo pi gin me aura ma en otiyo i lobo pa Kam, ki gin maraco ma kelo lworo ma en otiyo i dog Nam Makwar.

²³ Mumiyo en owacci onoŋo ebetyekogi woko, ka nene pe Moses, ma en aye dano ma eyero, ocuŋ i nyime, i kin en ki lwakke, ci oloko akemone woko omiyo pe otyekogi.

²⁴ Gucayo lobo maber ma yomo cwiny dano-ni woko, ma pe gubedo ki niye wacel i kom gin ma Lubaŋa ociko,

²⁵ Gubedo i kemagi kun giŋur aŋura, dok pe guwinyo lok ma Rwot owaco botgi.

²⁶ Omiyo en otiŋo ciŋe malo okwoŋo kwoŋ botgi ni, ebimiyo gito i dye tim,

²⁷ dok ebikeyogi woko i kin rok mapatpat, kun eketogi woko atata i lobo mapol.

²⁸ Cutcut guribbe ki rok mukene ka, woro jok Baal i Peor, dok gucamo gitum ma gityero pi jo muto;

²⁹ gumiyo kiniga omako Rwot pi gin ma gutimo, ki two gemo marac bene opoto i komgi.

³⁰ Finekaci oa malo, omine pi tyeko lokke, ci two gemo otuggi gik woko cut.

³¹ Gibedo ka po pi lok man ni en dano ma kite atir, gibipo iye bene matwal pi kare pa yalwak ducu.

³² Gumiyo kiniga omako Rwot i ŋet pii me Meriba pi meno omiyo Moses oneno can malit pigi.

³³ Gumiyo cwiny Moses odoko kec, omiyo oloko lok ma onoŋo myero pe en oloki,

³⁴ Pe guneko jo me rok mukene, kit macalo onoŋo Rwot ocikogi kwede,

³⁵ ento gurubbe woko ki lurok, gubedo ka lubo yo me woro cal jogi macalo lurok giworo.

³⁶ Lwak pa Lubaŋa gubedo ka woro cal jogi, ma olokke odoko owic botgi.

³⁷ Gubedo ka tyero litino awobegi ki anyiragi macalo gitum bot jogi.

³⁸ Guneko jo mapol ma gipe ki bal, ma gin aye litino awobegi ki anyiragi, ma yam gutyero bot cal jogi me Kanaan macalo gitum; ci pi remo pa dano ma guoyo omiyo lobo odoko gin me kwer.

³⁹ Gudoko jo ma keni pi gin: ma gutiyo; i gin ma gutiyo gubedo ka timo tim me kwele kwele.

⁴⁰ Mumiyo kiniga omako Rwot i kom jone, omiyo okwero jone woko, ma gin aye gipinnye-ni.

⁴¹ Pi meno oweko omiyogi i ciŋ lurok, oweko lukworgi ma yam gidaggi aye gubedo ka loyogi.

⁴² Lukworgi ounogi mada, gudiyogi piny i te locgi.

⁴³ Rwot olaro jone tyen mapol, ento gin gubedo ka jemo woko kome i gin ducu ma gutimo; gupoto piny twatwal pi balgi.

⁴⁴ Ento Rwot pud owinyo kokogi aye i kare ma gukok, oniaŋ ada ni gitye ki can,

⁴⁵ Omiyo opo pi gicikkene pigi; pi mar mere ma pe lokke omiyo Rwot oŋut oloko tamme.

⁴⁶ Omiyo jo ducu ma giloyogi macalo opii me bedo ki kica i komgi.

⁴⁷ Larwa, ai Rwot Lubaŋawa, cokwa woko ki i kin lurok, wek wapwo nyiŋi maleŋ, waum ka wapaki.

⁴⁸ Gipwo Rwot, Lubaŋa pa Icrael, gipake nakanaka! lo ducu myero guwac ni, “Amen!” Wupak Rwot!