Jabuli 105 - Acoli Baibul

Lubaŋa ki lwakke

¹ Wumi pwoc bot Rwot, wulwon nyiŋe, wumi ticce oneŋe i kin rok ducu!

² Wuwer bote wer me pako en, wutit ticce me aura ducu!

³ Wuket deyo i kom nyiŋe maleŋ: jo ma yenyo Rwot cwinygi obed yom!

⁴ Wubin bot Rwot wek wunoŋ tek ki bote, wubed i nyime nakanaka.

⁵ Wupo i kom tic me aura ma en otiyo ducu, taŋo ma yam otiyo ki kop ma en oŋolo,

⁶ wun likwayo pa Abraim ma yam laticce, wun litino pa Yakobo ma en oyerowu.

⁷ En aye Rwot Lubaŋawa; kop ma en oŋolo romo i lobo ducu.

⁸ En cwinye omoko I kom gicikkene ma bedo nakanaka, i kom lok ma yam ociko, pi yalwak alip ki alip,

⁹ en gicikke ma oketo ki Abraim, ki lok ma yam okwoŋo ki Icaka,

¹⁰ ma omoko odoko cik bot Yakobo, wek obed gicikke ki Icrael matwal,

¹¹ kun wacci, “Abimiyo lobo Kanaan botwu, obed lobo me aleyawu.”

¹² I kare ma pud gin nok, ma welgi tidi, ma pud gin lubedo i lobo-nu,

¹³ ma giwirre i kin rok mapatpat, ma gia ki i te ker acel gikobo i rok mukene,

¹⁴ Lubaŋa pe oye ŋat mo odiyogi. Ojuko luker mapol pigi kun wacci,

¹⁵ “Pe wugud kom jo ma an awirogi, pe wutim lunebina marac!”

¹⁶ I kare ma Rwot ocwalo kec opoto i lobogi, ci okwanyo camgi ma gikwo kwede woko ducu,

¹⁷ noŋo en ocwalo Yucepu okwoŋo nyimgi, en dano ma yam gicato woko macalo opii-ni.

¹⁸ Gitweyo tyene woko ki nyor matek, girwako atego nyonyo i ŋute,

¹⁹ nio waŋ ma lok ma en oloko-ni ocobbe kakare; lok pa Rwot oteme onoŋo ni en tye atir.

²⁰ Kabaka ocwalo dano ci gigonye woko, laloc me lobo ogonyo nyor woko oweko en ocito gire.

²¹ Kabaka oketo en obedo rwot ma loyo ode, ki ŋat ma loyo jamine ducu;

²² omiye bene twero me pwonyo rwodi kit ma cwinye mito, dok me pwonyo ludito ma gimiye tam ki ryeko.

²³ Omiyo Icrael obino i Ejipt, en Yakobo odoko labedo i lobo pa Kam.

²⁴ Rwot omiyo lwakke gunywalo litino mapol, dok omiyo gudoko tek ma kato lukworgi.

²⁵ Oloko cwiny jo Ejipt omiyo gukwero jone, ci gutiyo ki luticce i kit me bwolo.

²⁶ En ocwalo laticce Moses, ki Aron ma en aye oyero.

²⁷ Gutiyo lanyut pa Lubaŋa madito, gutiyo taŋo mapol i lobo pa Kam.

²⁸ Ocwalo colpiny, ci lobo ocido woko odoko collicuc; ento gujemo woko pe guwinyo lokke.

²⁹ Oloko pii ma i kulu megi odoko remo, omiyo rec ma tye iye ducu guto woko.

³⁰ Lobogi opoŋ ki lwak ogwal mapol ata, kadi wa gaŋ kal pa kabaka noŋo opoŋ ki ogwal keken.

³¹ Lubaŋa oloko, ci omiyo lwak lwaŋi madwoŋ obino, ki nyoggi bene gucorre i lobogi ducu.

³² Omiyo pee ocwer ma ka kot, ki lutkot bene owil mutyeko lobogi woko ducu.

³³ Ojwero olok ki yat odurogi ducu, ci oturo yadi ducu ma i lobogi.

³⁴ Dok oloko ci bonyo ocorre, lwak litino bonyo ma welgi pe kwanne;

³⁵ gucamo ginapita woko liweŋ ki i lobo, gucamo kit kwa ginapita me cam ducu ma gupuro i lobogi.

³⁶ Oneko litino kayogi wa co woko ducu, ma gin aye jo ma gukwoŋo nywalo ki tekogi.

³⁷ Okwanyo jo Icrael okelogi woko ma gutiŋo ryal ki jabu; dano mo ma ogatte i kin kakane ducu obedo pe,

³⁸ I kare ma gua woko ki kunnu jo Ejipt cwinygi obedo yom, pien onoŋo gilworogi mada,

³⁹ En oyaro pol malo ka wi jone, dok omiyogi mac me menyo piny dyewor,

⁴⁰ Gulege ci ocwalo aluru, ocwalo kwon mabup ki i polo wek gucam guyeŋ.

⁴¹ Obaro got ci pii onyette okatti ki iye, omol ki i dye tim aroo calo kulu,

⁴² En opo i kom cikkene maleŋ, ki i kom Abraim ma laticce.

⁴³ En okwanyo jone otelogi ki yomcwiny, ma lwakke ma en oyero gidaŋŋe ki wer matek.

⁴⁴ Omiyogi lobo pa lurok, omiyo gukwanyo cam ki i poto ma jo me rok mukene guyelle iye,

⁴⁵ wek lwakke gulub cikke, dok gugwok gin ma en ociko ducu. Wupak Rwot!