Jabuli 104 - Acoli Baibul

Rwot gwoko ginaketane

¹ Pak Rwot, in tiponal Ai Rwot Lubaŋana, in idit twatwal! Irukke ki dit ki deyo;

² iumo komi woko ki ceŋ calo iruko boŋo, Iyaro polo woko macalo kema ma giyaro,

³ dok igero kicika me otti malo i wi pii. Iloko pol odoko gadigadini, ituk iŋweco woko ki gadigadini i dye yamo.

⁴ Iloko yamo odoko laorri, kun leb mac ma lyel gubedo luticci.

⁵ Iketo lobo ocuŋ matek i kom gutine, ma pe biyeŋŋe wacel.

⁶ Iumo woko ki nam matut calo giumo ki ginaruka, ki pii bene omwonyo godi woko ducu.

⁷ Ento i kare ma ijuko pii, ci oriŋo woko; i kare ma owinyo dwani omor kun idaŋŋe natek, ci orwenyo woko liweŋ,

⁸ Omol ki i wi godi okato ocito piny i luŋ, i kabedo ma yam iyero pire.

⁹ Iketo ki pii waŋ lobo ma pe myero oŋol okat i ŋeye, wek pe dok oum lobo woko odoco.

¹⁰ Imiyo pii nyette mol i luŋ, kun mol ki i kin godi.

¹¹ Lee tim ducu gimato pii meno, kana me tim bene gimato gineko ki orwo,

¹² Lwak winyi gigero odigi i wi yadi ki i ŋet kulu, ci gibedo ka koko i jaŋ yat.

¹³ Icwalo kot ki i polo cwer piny i wi godi, lobo opoŋ ki jami ducu ma in itiyo.

¹⁴ Imiyo lum lot doŋo me cam pa dyaŋ, ki ginapita ma myero dano oti kwedgi, wek dano opur lobo ci onoŋ cam,

¹⁵ ki koŋo vino ma yo mo cwiny dano, ki moo me wir wek waŋe obed ma ryeny aryenya, ki dok ocam kwon ma miye teko.

¹⁶ Yadi pa Rwot limo pii mabup, gin aye yadi cedar me Lebanon ma yam en opitogi-ni.

¹⁷ Lwak winyi mapol gigero odigi i wi yadi-kunnu; winyi aramatala bene gibedo i wi yadi maboco,

¹⁸ Dyegi me tim gibedo i wi godi ma malo twatwal, ki okile giriŋo gikanne i got.

¹⁹ Iketo dwe me poko kare; ceŋ ŋeyo kare me potone.

²⁰ In aye ma iketo colpiny omiyo dyewor tye; i kare meno aye lee ma gibedo i buŋa gicako kwede wotgi.

²¹ Litino labwor gidwaro lee ki koko, kun giyenyo cam ma Lubaŋa miyo botgi.

²² Ka ceŋ otuc gidok woko cen, ci gibuto i gorogi,

²³ Dano kato woko cito ka tic ci tiyo ticce nio wa otyeno,

²⁴ Ai Rwot, in doŋ itiyo lwak jami mapol! Itiyogi ducu ki ryeko, omiyo lobo opoŋ ki ginaketani.

²⁵ Nam madit malac bene tye kuca, lwak ginaketa ma welgi pe kwanne bedo iye, gin makwo matino ki madito.

²⁶ Mel bene woto ki iye, dok twol ma min kulu ma iketo-ni bene tuko iye.

²⁷ Gin ducu gineno boti, gimito imigi cam i kare ma mitte kikome.

²⁸ Ka imiyogi cam, ci gigamo gicamo woko; ka iyabo ciŋi imiyogi cam, ci giyeŋ ki jami mabeco mada.

²⁹ Ka ikanne woko ki botgi, ci gineno can; ka ikwanyo yamo me yweyoni woko ki botgi ci gito woko, gidok i apwa ka ma’ yam gua ki iye.

³⁰ Ka iketo yamo me yweyoni i igi ci gibedo kwo; dok bene imiyo lobo doko nyen.

³¹ Deyo pa Rwot myero ori nakanaka! Rwot myero obed ki yomcwiny pi gin ma en otiyo.

³² Rwot neno lobo ci miyo yeŋŋe, en gudo godi ci giduny yito,

³³ Abiwero wer bot Rwot pi kare me kwona ducu; abiwero wer me pako Lubaŋana ka pud akwo.

³⁴ Wek lok ma alwodo ki i cwinya oyom cwiny Rwot, pien en aye ma miyo abedo ki yomcwiny.

³⁵ Wek gityek lubalo woko liweŋ ki i lobo, dok wek jo maraco bene gurweny woko matwal! Pwo Rwot, in tipona! Wupwo Rwot!