Jabuli 103 - Acoli Baibul

Pak pi mar pa Rwot

¹ Pwo Rwot, in tipona; kwona ducu myero opak nyiŋ Rwot maleŋ!

² Pwo Rwot, in tipona; wii pe myero owil i kom mot ducu mabeco ma en omiyi.

³ En ma weko balla ducu, en bene ma caŋo two ducu ki i koma.

⁴ En olaro kwona omiyo pe adonyo i bur, oketo mar mere ma pe lokke kacel ki kicane i koma;

⁵ en miya jami mabeco pi kare me kwona ducu, kun roco tekona kare ki kare macalo pa ocur.

⁶ Rwot ŋolo kop kakare dok maromrom, ŋolo bene kop pa jo ma giunogi atir.

⁷ En otuco yubbe woko ducu bot Moses, omiyo jo Icrael guneno tic me aura ma en otiyo.

⁸ Rwot lakica dok maro dano, kiniga pe make oyot, mar mere ma pe lokke dwoŋ,

⁹ En pe bibedo ka jukowa kun juyowa kare ducu, kinigane bene pe ri nakanaka.

¹⁰ En pe timowa kun poro bal ma watimo, dok pe culo kwor i komwa kun poro kit roc ducu ma watimo.

¹¹ Kit macalo polo tye malo i wi lobo, mar mere ma pe lokke bene dit kit meno bot jo ma lwore.

¹² Kit macalo tuŋ wokceŋ tye bor kwede ki tuŋ potocen-ni, en kwanyo balwa woko ducu ki i komwa cwalo ka mabor kit meno.

¹³ Macalo wegi litino bedo ki kica i kom litinogi, Rwot bene kica mako kit meno i kom jo ma lwore.

¹⁴ En ŋeyo kit gin ma ecweyowa kwede; en po ni wan apwa mamwa.

¹⁵ Nino me kwo pa dano obedo calo lum; en lot, turu macalo ature ma tye i okan,

¹⁶ Yamo kodo ŋeno, ci rwenyo woko liweŋ, kabedo ma en ocuŋ iye-ni doŋ pe bineye matwal.

¹⁷ Ento mar pa Rwot ma pe lokke bedo nakanaka pi jo ma wore, dok berre bedo nakanaka bot jo me yalwak ducu,

¹⁸ bot jo ma gwoko gicikkene, ma gipo pi tiyo gin ma en ociko.

¹⁹ Rwot ocibo komkerre i polo; en kabaka ma loyo ducu.

²⁰ Wupak Rwot, wun lumalaika matek, ma wulubo cikke, kun wuwinyo lok ducu ma en waco botwu!

²¹ Wupak Rwot, wun lwak me monnye ducu ma wutye i polo, wun luticce ma wutiyo gin ma en mito!

²² Wupak Rwot, wun ginaketane ducu, i kabedo ducu ma en loyo! Pwo Rwot, in tipona!