Jabuli 102 - Acoli Baibul

Koko pa dano ma tye ki can

¹ Ai Rwot, winy legana; wek kokona owinnye boti!

² Pe ikanne woko bota do i kare ma atye ki can! Cik iti iwiny lokka, gam doga oyotoyot i nino ma akok iye boti-ni!

³ Karena tye ka rwenyo woko calo yito, ma cogona ducu waŋ awaŋa calo ruk mac.

⁴ Gipwoda woko calo lum mutwo, miyo wiya wil woko ka camo kwon.

⁵ Acur matek kit man; riŋo koma omoko woko i kom cogona likiŋ,

⁶ Abedo calo acut ma bedo i tim, calo tula ma bedo i wi obur.

⁷ Abuto ma nino pe mako waŋa, atye calo winyo ma bedo kene i wi ot malo.

⁸ Lukworra giloko lok aŋec i koma dyeceŋ jwi, jo ma nywara gilwoŋo nyiŋa kun giceno ki jo mukene,

⁹ Buru doŋ olokke odoko camma, arubo pig waŋa ki ginamatana,

¹⁰ pi lyeto me akemoni ki kinigani; in doŋ ityeko kwanya ibola woko.

¹¹ Kwona obedo calo tipo me otyeno ma cok rwenyo; alokke doŋ adoko calo lum mutwo.

¹² Ento in ibedo i wi komkerri matwal, ai Rwot; yalwak me kare ducu gibipo pi nyiŋi,

¹³ Ibia ci kica maki i kom Cion; kare doŋ oromo me nyuto berri bote; kare ma iciko pire doŋ oromo.

¹⁴ Luticci gimare, kadi bed onoŋo doŋ gedo ducu iye odoko odur godi, kica makogi i kome pien doŋ en odokoapwa.

¹⁵ Rok ducu bilworo Rwot, luker ducu ma i wi lobo gibilwore pi deyone.

¹⁶ Rwot bigero Cion odoco; en bituc kun nyuto deyone.

¹⁷ En biwinyo lega pa jo ma piny doŋ obwoyogi woko adada, pe bicayo lega me bako dog ma gikelo i nyime.

¹⁸ Wek gico lok man gigwok maber pi yalwak me kare ma bibino anyim, wek omi jo ma pud peya ginywalogi gupak Rwot, ni,

¹⁹ Rwot oneno piny ki i kabedone maleŋ ma tye malo, en oneno piny i lobo ki i polo,

²⁰ wek cwiny koko pa lumabuc, dok wek egony jo ma doŋ gityeko ŋolo kop me to i wigi,

²¹ Kumeno dano gibipako nyiŋ Rwot i Cion, gibipake i Jerucalem

²² i kare ma lwak me rok ducu cokke kacel, wa ker ducu, pi woro Rwot.

²³ Rwot oturo tekka woko ma pud atidi; ojwiko nino me kwona obedo manok.

²⁴ Awacci, “Ai Lubaŋana, pe ikwany kwona woko ma pud peya ati!” Rwot, in ibedo nakanaka i kare pa yalwak ducu.

²⁵ I kare macon mukato aŋec iketo guti me te lobo, dok in aye ma itiyo polo ki ciŋi,

²⁶ Gibito woko, ento in ibedo meri matwal; gibiti woko macalo boŋo. In ilokogi macalo ginaruka, ci gitum woko liweŋ;

²⁷ ento in kiti acel, mwaka me kwoni bene pe gik.

²⁸ Ibitniyo litinowa, wan luticci, gibibedo ki kuc laboŋo peko mo; dok in aye ma ibigwoko likwayogi.