Jabuli 10 - Acoli Baibul

Lega pi tyeko jo maraco woko

¹ Piŋo icuŋ cen ka mabor, ai Rwot? Piŋo ikanne woko i kare me can?

² Jo maraco giwakke ma gidwaro lucan me aneka; mi yub ducu maraco ma guyuboni aye otyekgi.

³ Dano marac nyatte pi mitine maraco ma tye i cwinye; dano ma wor ma mito enoŋ magoba yeto Rwot dok kwere woko bene.

⁴ Dano marac tamo ki cwiny me wakke kun wacci, “Lubaŋa peke.” En pe paro, dok pe bino bot Lubaŋa.

⁵ Gin marac ma en tamo ducu tiyo co bo kakare. En pe niaŋ i ŋolo kop pa Lubaŋa pien malo twatwal; en neno lukworre ci jwiyogi woko ajwiya.

⁶ En ta mo ki i cwinye kun wacci, “Gin mo pe ma biloya; i kare me kwona ducu pe abineno can,”

⁷ Lokke ducu ma en loko opoŋ ki ceno dano acena, bwola ki bura me diyo dano ki tek; en pe galle me loko lok marac ki lok ma kelo adagadaga.

⁸ En kanne woko i dye gaŋi ka kiyo piny; en libo dano kunnu ci neko jo ma gipe ki bal.

⁹ En neno piny kun roto dano ma can omako adada ma piny oloyo; en kanne woko i muŋ ka kiyogi calo labwor. En kanne woko pi kiyo lacan wek emak woko, en mako lacan noŋo doŋ oleko wiye okelo omoko i obwone.

¹⁰ Dano ma can omako adada gininyo woko, ci donyo woko piny i ŋom, pien teko pa lakworre noŋo oloyo mere woko.

¹¹ Dano marac tamo ki i cwinye ni, “Wi Lubaŋa doŋ otyeko wil woko, omiyo waŋe woko, pe bitwero nena.”

¹² Bin ilara do, ai Rwot! wii pe myero owil i kom ŋat ma tye ki can, ai Lubaŋa!

¹³ Piŋo dano marac kwero Lubaŋa, kun tamo ki i cwinye ni, “In pe ibipwoda?”

¹⁴ Ento in iŋeno, dok iŋeyo can ki cwercwiny ma dano tye kwede, kare ducu it ye ka yubbe me miyo kony, Dano ma tye ki can-ni miyo kwone boti, pien yam ibedo ka konyo litino kic.

¹⁵ Myero itur twero pa jo maraco ki lutim maraco woko; yeny balgi ducu nio waŋ ma pe doŋ ibinoŋo bal mo kadi ki acel.

¹⁶ Rwot aye’ kabaka ma bedo nakanaka; lurok ducu gibito gitum woko ki i lobone,

¹⁷ Ai Rwot, iwinyo lega pa jo mamwol: ibimiyo gibedo ki tekcwiny, ibiciko iti.

¹⁸ Iŋolo kop pa litino kic ki jo ma giunogi, wek dano mo me lobo man pe dok okel lworo.