Icaya 9 - Acoli Baibul

Nywalo laker ma bikelo kuc ki Loc maber

¹ Dano yam gicayo lobo Jabulon ki lobo Naputali, ento en bimiyo piny ma neno yo tuŋ i nam, loka Jordan, Galilaya pa lurok, doko me deyo.

² Jo ma yam gibedo i piny macol doŋ guneno dero cen madit; ki jo ma yam bedo i lobo me mutu me piny macollicuc, ceŋ doŋ oryeny omenyogi.

³ In doŋ imiyo jo me rokwa onya, imedo bene yomcwiny botgi; gibedo ki yomcwiny i nyimi, kit ma dano bedo kwede i kare me kac, kit ma dano bedo kwede ki yomcwiny ka gipoko jami ma guyako.

⁴ Pien okolgi mapek, ki odoo ma goyo gwokgi, ki odoo ma yam giburogi kwede tektek me tiyo tic, in doŋ iturogi woko ducu, macalo i nino pa jo Midian.

⁵ Pien war pa oteka lweny ducu ma ginyono ki piny i dye lweny, ki boŋŋi ducu ma ginywano woko ki remo, gibiwaŋogi woko ki mac ma ka yen.

⁶ Pien doŋ ginywalo botwa latin, gimiyo botwa latin laco; gibimiyo en tiŋo twero me Loc i wi gwoke, nyiŋe gibicako ni, “Lami-tam ma giuro, Lubaŋa Won Twer, Won ma bedo nakanaka, Laloc ma kelo kuc.”

⁷ Doŋ medde me locce ki kuc ma bia iye ka gikke bibedo pe, i wi komker pa Daudi, ki i wi kerre, me mokone ocuŋ matek ki gwokone wek pe opoti, i ŋolo kop atir ki i kit ma atir, cakke tin dok me bedo matwal. Arima pa Rwot me mony bimiyo man cobbe.

Rwot biketo can i kom jo Icrael

⁸ Rwot ocwalo lok i kom Yakobo, lok meno bipoto i kom Icrael;

⁹ lwak ducu biŋeyo, Epraim ki jo ma bedo i Camaria, ma gin jo ma luwakke ma gicayo dano ki i cwinygi kun giwaco ni,

¹⁰ “Matafali doŋ opoto woko piny, doŋ wabigero gedo ki got ma gipayo apaya; olam doŋ gitoŋo woko, ento wan wabileyo kakargi ki yat cedar.”

¹¹ Rwot tye ka kelo lumerok i komgi, dok tye ka tugo lukworgi.

¹² Jo Ciria yo tuŋ wokceŋ ki jo Piliciti yo tuŋ potoceŋ guŋamo doggi, gitye ka mwodo jo Icrael woko. Man ducu pe okweyo kiniga pa Rwot, en pud tye ka ryeyo cine aryeya ikomgi.

¹³ Ento dano pe gulokke gudwogo bot ŋat ma opwodogi-ni, pe bene guyenyo Rwot me mony,

¹⁴ Pi meno omiyo Rwot oŋolo wi Icrael woko kacel ki yibe, oŋolo bene jaŋ otit ki lagada i nino acel.

¹⁵ Ludito kacel ki jo ma giworo gubedo lutel wi Icrael, doŋ lanebi ma pwonyo lok me goba en aye yib Icrael.

¹⁶ Jo ma telo rok man gurwenyo lwak me rok man woko, jo ma gitelogi tamgi oballe woko.

¹⁷ Meno omiyo Rwot pe obedo ki yomcwiny i kom awobegi, kica bene pe mako i kom litino ma wongi pe, ki mon ma coggi oto; pien ŋat acel acel i kingi pe woro Lubaŋa, dok gin ducu gudoko lutim tim maraco, lok ducu ma giloko obedo lok me miŋo keken. Man ducu pe okweyo kiniga pa Rwot, en pud tye ka ryeyo ciŋe aryeya i komgi.

¹⁸ Pien tim maraco waŋ woko calo mac, waŋ calo okuto ki ocok ma wan imac; gamo agaba ma i buŋa, kun gin ducu gidoko yito ma duny cito malo.

¹⁹ Pien akemo pa Rwot me mony omiyo lobo tye ka waŋ ki mac, jo ma gibedo iye ducu doŋ gudoko calo yen ma waŋ i mac; pe tye ŋat mo iye ma timo kica ki ominne.

²⁰ Gimayo ki tuŋ lacuc, ento noŋo kec pud tye ka nekogi, gicamo ki tuŋ lacam, ento noŋo pud pe romogi; dano acel acel camo riŋo kom lawote.

²¹ Manace camo Epraim, ki Epraim bene camo Manace, gin aryo ducu guribbe kacel guero lweny i kom Juda. Man ducu pe okweyo kiniga pa Rwot en pud tye ka ryeyo ciŋe aryeya i komgi.