Icaya 7 - Acoli Baibul

Lok mukwogo ma Icaya otito bot Akaj

¹ I kare pa Akaj wod pa Yocam, wod pa Ujia, kabaka me Juda, Rejin kabaka me Ciria, ki Peka wod pa Remalia, kabaka me Icrael, gin aryo ducu yam gubino i Jerucalem pi lweny i kome, ento pe gutwero loyone.

² I kare ma gitito lokke bot likwayo pa Daudi ni, “Jo Epraim doŋ guribbe woko ki jo Ciria,” cwiny Akaj ki pa lwakke omyel twatwal kit macalo yamo yeŋo kwede yat ka tye ka kodo.

³ Rwot owaco bot Icaya ni, “Cit irwatte ki Akaj, in kacel ki wodi Cear-yacub. Cit irwatte kwede i agikki me yo pii ma mol a ki i joro ma malo, i yo gudo ma cito i poto pa lalwokboŋo,

⁴ ci iwacce ni, ‘Gwokke, bed mot laboŋo lworo mo, cwinyi bene pe opoti pi kiniga malyet ma omako Rejin ki jo Ciria ki wod pa Remalia, pi ajut aryo ma guwan woko ma yitogi tye Ica dunynyi.

⁵ Pien jo Ciria ki jo Epraim ki wod pa Remalia guporo lok marac ma myero gitim i komi, kun giwacci,

⁶ “Wacitu walwenyu i kom Juda, wami obed ki lworo madwoŋ, wek wamaa woko obed mewa, ci waketu wod pa Tabcel me bedo kabaka iye.”

⁷ Meno omiyo Rwot. Lubaŋa owaco kuman ni, Cobo tamgi biloyogi woko, pe bicobbe ada.

⁸ Pien Damaciko aye gaŋ madit me Ciria, ki Rejin aye rwot me Damaciko. (Ma pud peya mwaka pyerabicel wiye abic otum, gibiŋinyo jo Epraim, bimiyo pe dok gimedde me bedo rok.)

⁹ Camaria aye gaŋ madit me Epraim, ki wod pa Remalia aye rwot me Camaria. Ka ce pe wubiye, adada, pe wubicun matek.’ ”

Lok ma Icaya oloko i kom Immanuel

¹⁰ Rwot dok owaco ki Akaj ni,

¹¹ “Peny pi Lanyut mo ki bot Rwot Lubaŋani; kadi lanyut ma tye piny ka matut i lyel nyo kadi ma tye malo i polo.”

¹² Ento Akaj ogamo kun wacci. “Pe abipenyo Lanyut mo, dok pe abitemo Rwot.”

¹³ En dok owaco ni, “Koŋ wuwiny wun likwayo pa Daudi! Yelo dano ma wuolo komgi pe romowu, mumiyo wutye ka olo kom Lubaŋana dok bene-ni?

¹⁴ Pi meno, Rwot kikome aye ma bimiyo botwu lanyut. Nen, nyako mo ma peya oneyo laco biyac, ci nywalo latin laco, gibicako nyiŋ latin meno ni Immanuel.

¹⁵ Latin meno bimato cak lukulu ki moo kic, ka doŋ oneyo kwero gin marac ki yero gin maber.

¹⁶ Pien ma pud peya latin-nu ŋeyo kwero gin marac ki yero gin maber, lobo ma itye iye ki lworo madit i kom lukerre aryo-nu gibiweko doŋ noŋo.

¹⁷ Rwot bimiyo kare mo bino i komi ki i kom lwakki, ki i kom jo me doggola me ot pa kwaru ma yam peya onen cakke ma jo Epraim gupokke woko ki jo Juda; en bikelo kabaka me Aciria.”

¹⁸ I kare meno, Rwot bilwoŋo lwaŋi ma bedo i acakki kulu me Ejipt, ki kic ma bedo i lobo Aciria ki lwiyo.

¹⁹ Gin ducu gibibino gio woko lirut i luŋ matut, ki i kin got ma obar, ki i wi okuto-gu ducu, ki i olet ducu,

²⁰ I kare meno Rwot bikelo dano mo ki loka kulu Euprate, ma en kabaka me Aciria. En bitimowu malit calo dano ma gilyelo yer wiye ki yer kome woko ducu, bilyelo yer tik woko bene.

²¹ I kare meno dano bigwoko roya ki megi romi aryo,

²² doŋ pi cak madwoŋ twatwal ma gibimiyo bot dano-nu, miyo dano meno bimato cak lukulu ki moo kic.

²³ I kare meno potti ducu ma yam ginoŋo iye tyen olok alip acel, ma poto acel acel gicato i wel me cekel me ryal alip acel bene, bibedo okuto ki ocok keken.

²⁴ Dano bicito kunnu ki atum ki atero, pien okuto ki ocok biromo lobo ducu;

²⁵ ento lobo ducu ma bedo cerecere ma yam onoŋo gipuro ki kweri, pe dok wubicito iye pi lworo okuto ki ocok. Kabedo meno bidoko ka ma dyaŋi camo iye kengi; dok romi ki dyegi gibibedo ka nyono piny iye atata.