Icaya 65 - Acoli Baibul

Lubaŋa biketo can i kom jo ma gujemo

¹ Yam ayubbe pi gamo lok pa jo ma pe gikok bota, ento gin gigi pe gumito penya. Ayubbe bene ni myero gunona, ento pe gigi gutemo yenya. Abedo ka waco botgi ni, “An atye en, an atye en.” Aloko bot rok ma onoŋo doŋ pe gilwoŋo nyiŋa.

² Abedo ka ryeyo ciŋa dyeceŋ jwi bot jo ma gijemo woko ajema, jo ma woto i yo ma pe ber wacel, kun gilubo gigi ryekogi kengi,

³ Gibedo ka ŋeto cwinya kare ki kare, kun gibedo ka tyero gitum bot jogi i potti, giwaŋo odok eceta-gu i kom matafali;

⁴ gibedo ka bedo i lyel-gu, i dyewor gibedo i kabedo mogo ma i muŋ; gibedo ka camo riŋo opego-gu, jami tedogi ducu onyobbe woko ki pig riŋo lee ma gikwero.

⁵ Gin jo ma giwaco ni, “Bed kaikeni kunnu, pe ibin cok kweda, pien an doŋ gipoka woko pat kwedi pien an aleŋ,” Jo magi calo yito ma duny i uma, gicalo mac ma pe to kadi ki acel.

⁶ Nen, doŋ gityeko coyo lok i nyima ni, “An pe abilin aliŋa, ento abiculo. Adada, abiculogi gire,

⁷ timgi maraco kacel ki tim maraco pa kwarogi, man Rwot ma owaco pien gubedo ka waŋo odok eceta i wi godi, dok gubedo ka yeta bene i wi ceregu ducu; abiporo culgi ma oromogi abiculogi pi balgi macon.”

⁸ Rwot owaco kuman ni, “Kit macalo koŋo vino noŋŋe ki i nyig olok, doŋ dano giwaco ni, ‘Pe ibal woko, pien gum tye iye’, abitimo kit meno pi luticca, pe abityekogi woko ducu.

⁹ Abimiyo likwayo a ki i kom Yakobo, ki jo ma bileyo wi godi na a ki i Juda; jona ma ayero gibileyo bedo megi, doŋ luticca gibibedo kunnu.

¹⁰ Caron bidoko ka ma gikwayo iye romi, ki luk me Akor bidoko kabuto pa dyaŋi, bibedo pa jona ma gubedo ka yenya.

¹¹ Ento wun jo ma doŋ wubwoto Rwot, ma wiwu doŋ owil woko i kom got mera maleŋ, ma wuyubo meja pa jok wek omiwu gum, ma wupiko kono ma ginyo bo poŋ kikopo pi jok wek nyimwu obed leŋ,

¹² abimiyo ginekowu woko ki pala lucwan, wun ducu wubiguŋo aguŋa ka giŋolo ŋutwu, pien i kare ma yam alwonowu wun wukwero gamo doga woko, i kare ma abedo ka lok bene pe wuciko itwu ka winyo lokka, ento wubedo ka timo gin ma nen marac i nyima, wuyero bene gin ma pe yomo cwinya.”

¹³ Meno omiyo Rwot Lubaŋa owaco ni, “Nen, luticca bicamo cam, ento wun kec binekowu; luticca bimato pii, ento wun orwo pii binekowu matek; luticca gibibedo ki yomcwiny, ento wun gibimiyo lewic makowu;

¹⁴ yomcwiny bimiyo luticca giwera ento cwercwiny bimiyo wukok, dok bene bimiyo wudaŋŋe matek ki koko.

¹⁵ Nyinwu bidoŋ bot jona ma doŋ ayero giceno ki dano, Rwot Lubaŋa kikome aye ma binekowu; ento luticce doŋ en bilwoŋogi ki nyiŋ mapat.

¹⁶ Pi meno, ka ce ŋat mo lamo gum i kome kekene i lobo, en bilamo gum i kome kene ki nyiŋ Lubaŋa me ada, dok ŋat ma bikwoŋo kwoŋ i lobo man, bikwoŋo ki nyiŋ Lubaŋa me ada, pien wiwu doŋ biwil woko i kom can ma yam wuneno con, can meno doŋ birwenyo woko ki i wiwu.” Polo manyen ki lobo manyen

¹⁷ Rwot dok owaco kuman ni, “Pien nen, aketo polo manyen ki lobo manyen; pe doŋ gibipo pi jami macon, pe bene dano mo bitamo pigi.

¹⁸ Ento myero cwinywu obed yom kun wubedo ki yomcwiny nakanaka i kom jami magi ma aketogi-ni; pien nen, Jerucalem ma aketo bibedo me yomcwiny, jone bene bibedo ki yomcwiny madwoŋ.

¹⁹ Abibedo ki yomcwiny i Jerucalem, cwinya bibedo yom i kom jona; dwan mo me koko pe dok biwinnye iye, kadi koko mo me can bene pe biwinnye iye,

²⁰ Latin mo ma ginywalo ma ri pi kare manoknok keken bene pe bibedo tye iye, kadi ladit mo muti ma pe bicobo karene, latin bito ma noŋo mwaka me ditte doŋ romo miya acel, labalo ma mwakane biromo miya acel noŋo giceno woko acena.

²¹ Dano gibigero odi ci gibedo i igi, gibipuro poto olokgi, ci gibicamo nyige bene.

²² Pe gibigero odigi ci giweko ŋat mukene aye bedo iye, pe gibipuro poto olokgi ci giweko ŋat mukene aye ma dok camo nyige, Jona gibiri ma rom aroma ki yat, jona ma an aye ayerogi gibibilo tic me ciŋgi pi kare malac.

²³ Ŋat mo i kingi pe biyelle ki tic noŋo, dok bene pe gibinywalo latin ci dok neno can; pien gin doŋ gibibedo litinic pa jo ma Rwot doŋ otyeko miyogr gum, kun gumgi-ni mako bene wa litinogi.

²⁴ Ma peya gulwoŋo lwoŋo, an abigamo doggi, ma pud gitye ka lok aloka, abiwinyo lokgi woko.

²⁵ Orudi ki latin romo gibicam kacel, labwor bicamo lum calo twon; twol bene bimoko apwa. Pe gibiketo ret i kom dano nyo kadi ki nek, i wi got mera maleŋ ducu.” Man Rwot ma owaco.