Icaya 60 - Acoli Baibul

Deyo ma bibedo tye i Jerucalem i anyim

¹ A malo ba, in Jerucalem, pien ceŋŋi doŋ otuc woko, deyo pa Rwot doŋ otuc ocaro komi woko.

² Nen, colpiny biumo lobo woko, mutu macol licuc biumo rok mukene woko, ento Rwot bituc pi caŋo komi, gibineno deyone i komi.

³ Lurok gibibino i Ieŋ pinnyi, luker bibino i dero ceŋ ma otuc i komi.

⁴ Tiŋ waŋi malo wek koŋ inen piny, jo ducu gibicokke kacel, gibibino boti; awobeni gibia ki ka mabor, anyirani gibitiŋogi atiŋa i kor.

⁵ Ibineno ci komi biryeny aryenya, cwinyi bimyel ci icako bedo ki yomcwiny; pien lim mabup me nam doŋ gibiweko i ciŋi, ki lonyo pa rok mapol gibikelo boti.

⁶ Lwak kinaga mapol biumi woko, litino kinaga me Midian ki me Epa; kadi wa jo me Ceba ducu gibibino boti. Gibibino gikelo jabu ki odok luban, gibitito ki pak pi gin mabeco ma Rwot otimo.

⁷ Romi ducu me Kedar gibicokogi boti, nyogi romi me Nebayot bikonyi; gibikelo macalo gitum i wi keno tyer me atyera bota, ci agamogi, dok abimedo deyo i kom oda me deyo.

⁸ Magi kono jo mene ma gituk calo pol-li, nyo macalo amam ma gidok i dog odigi?

⁹ Pien rok ma tye i dog nam bikura, mel ma oa ki i Tarcic aye bitelo yo, me kelo Litinoni ki ka mabor kacel ki lonyo madwoŋ twatwal, pi nyiŋ Rwot Lubaŋani ma en ŋat Maleŋ me Icrael, pien en doŋ oketo deyo i komi.

¹⁰ Lurok bigero celli, lukergi bikonyi ki tic; pien i kare ma yam akemo omaka, agoyi, ento pi mitina kena doŋ atyeko timo kica boti,

¹¹ Dogcelli bibedo twolo kare ducu, pe gibiloro i dyeceŋ kadi i dyewor; wek dano gukel lonyo pa rok ducu boti, kun giwoto ma gidorre dorre me deyo kacel ki lukergi,

¹² Pien rok ki ker ma pe biye locci bito; kodi rok macalo meno pud dok gibibalo lobogi woko aye.

¹³ Deyo me Lebanon bibino boti, ciprec ki yadi mabeco ducu, wek omi kabedona maleŋ onen ma mwonya; dok bene abimiyo kabedo me teno tyena poŋ ki deyo.

¹⁴ Litino pa jo ma yam giuni gibibino boti laguno; ki jo ma yam gubedo ka cayi gibiryebbe piny i te tyeni; gibilwoŋi ni in ibedo gaŋ pa Rwot, Cion ma obedo gaŋ pa ŋat Maleŋ me Icrael,

¹⁵ Ento kono yam koŋ giweki ata, gikweri woko, kun ŋat mo pe wok boti, abimiyo ibedo dit nakanaka, jo me kare ducu bibedo ki yomcwiny piri.

¹⁶ Ibibedo ka doto cak pa jo me rok ducu, ibidoto tuno pa luker; ibiŋeyo ni an a Rwot, anaye lalarri, dok an aye ma akoko in, an a Won Twero ma abedo Lubaŋa pa Yakobo.

¹⁷ Ma ka mola, an abikelo jabu, ma ka nyonyo, abikelo ryal, ma ka bao, abikelo mola, ma ka gweŋ abikelo nyonyo. Abimiyokucaye bedo maka ludoŋo ma loyo tic, kit ma atir aye bibedo nyamparani.

¹⁸ Tim me bwami pe dok biwinnye i loboni, kadi yak nyo kadi balle pa lobo pe binen i waŋ apokki loboni. Ibicako nyiŋ celli ni, Larre, ki dogcelli ibilwoŋo ni, Pak.

¹⁹ Ceŋ pe dok bimenyi dyeceŋ, kadi Leŋo me dwe bene pe bimenyi dyewor; Rwot aye ma bimenyi nakanaka, Lubaŋani aye ma bimiyo ibedo ki deyo.

²⁰ Ceŋŋi pe dok bipoto, dwe bene pe birwenyo; pien Rwot aye ma bimenyi nakanaka, kare me kumoni bene bigik.

²¹ Joni ducu doŋ gibibedo jo ma kitgi atir; gibileyo lobo doŋ doko megi matwal, gibinen macalo jaŋ yat ma an aye apito, tic ma an kikoma aye atiyo wek dano gumiya deyo.

²² Doggola pa joni nok ento olo doŋ bidoko kaka, ŋat matidi mada bi doko twon rok mo matek. An a Rwot; abimiyo man timme oyot ka karene oromo.