Icaya 6 - Acoli Baibul

Gin ma Lubaŋa onyuto me lwogo Icaya

¹ I mwaka ma kabaka Ujia oto iye, aneno Rwot mubedo i wi komkerre, kun onyedde malo, madit twatwal, ma dog boŋone opoŋo i ot pa Lubaŋa woko liweŋ,

² Lucerapi gucuŋ malo ka wiye, ma lacerapi acel acel bwome tye abicel; aryo me umo wangi, aryo me umo tyengi, ki aryo mukene me tukgi malo.

³ Onoŋo gitye ka wer ma ŋat acel acel gamo dog lawote ni, “Rwot me mony leŋ, leŋ dok leŋ; lobo ducu opoŋ ki deyone.”

⁴ Te guti me doggola ocako yeŋŋe pi wer ma guwero-ni, yito bene omwono i ot woko limuk.

⁵ Ka doŋ awacci, “Aneno can doŋ ba! Ato woko do! Pien an dano ma lok ma a i doga pe leŋ, dok bene abedo i kin rok ma lok ma giloko pe leŋ: ento aneno kabaka ki waŋa, ma en aye Rwot me mony.”

⁶ Cutcut ŋat acel i kin lucerapi otuk obino bota, kun omako lodi mac i ciŋe, ma en okwanyo ki i keno tyer, kun okaro ki lakar mac.

⁷ Ogudo ki doga kun wacci. “Nen, gin man ogudo del dogi; gin maracci doŋ gikwanyo, ki balli doŋ giweko.”

⁸ Cutcut awinyo dwan Rwot ma wacci, “Abioro aŋa mono? Aŋa ma bicito piwa?” Agamo ni, “An ene; ora.”

⁹ Ka doŋ en owacca ni, “Cit iwac ki rok man ni, ‘Winyone mere wubiwinyo, ento pe wubinian te lokke; nenone wubineno, ento pe wubineyo gin ma tye.’

¹⁰ Mi rok man cwinygi odok nwaŋ, mi itgi bene odiŋ woko, wek pe gunen ki waŋgi, pe bene guwiny ki itgi, pe bene guniaŋ iye ki cwinygi, wek omi pe gulokke gudwog bota acaŋgi.”

¹¹ Ka doŋ apenyo ni, “Pi kare ma rom mene, ai Rwot?” Ci en odokka iye ni, “Nio waŋ ma gaŋi ducu igi odoŋ nono, laboŋo dano mo ma bedo i igi, jo mogo ma gibedo i odi bene doŋ pe, lobo doŋ odoŋ nono laboŋo gin mo kadi ki acel,

¹² kun Rwot doŋ ocwalo dano woko cen ka mabor, wi obur ma gibwoto doŋ dwoŋ ata i lobo.

¹³ Kadi bed acel me apar pa jo ma onoŋo gubedo kenyo gudoŋ iye, pud dok gibiwaŋogi woko aye, calo kworo nyo opok, ma ajutte odon, ma noŋo doŋ gityeko toŋo kom vat woko piny.” Ajutte aye bedo kodi maleŋ.