Icaya 57 - Acoli Baibul

¹ Dano ma kite atir to, ŋat mo pe ma keto iye cwinye. Jo ma maro Lubaŋa gikwanyogi woko; ŋat mo pe ma paro pigi. Pien dano ma kite atir noŋo gikwanyo woko ki i can,

² en cako donyo i kuc; jo ma bedo kun cwinygi atir, giywe mot i kabutogi.

³ Ento wun wubin wunyik cok bota kany, wun litino pa dako ma latal, ma latim abor aye onywalo ki malaya.

⁴ Meno wutye ka nywaro aŋa ce? Wunamo dogwu malac kumeno i kom aŋa ma lebwu okatti woko kumeno-ni? Wun litino pa lutim bal, litino ma ginywalogi ki lok me goba,

⁵ wun jo ma mitiwu pe kwe i te yat kworo, i te yadi ducu ma pote olot liyuk; ma wuneko litinowu woko i luŋ-gu, i te pata got ma obar?

⁶ Gin ma gibipoko botwu tye i kin got mapwot ma tye i luŋ piny, gin jami-nu ducu mewu; pien doŋ wutyeko tyero gityer amata woko botgi, wukelo bene gityerwu me mo ko kwon, wutyero. Cwinya bibedo yom pi kodi tim macalo meno?

⁷ Doŋ wuketo kabutowu i wi got ma wiye bor, wun doŋ wutyeko cito kunnu ka tyero gitumwu bot jok.

⁸ Wuketo bene cal jok i ne kika ki i ne yat me doggola; pi weka woko, omiyo wupeto kabutowu. Wudonyo iye ka wuyaro obedo malac; wutyeko cikke kwedgi woko doŋ piwu kenwu, dok bene wumaro kabutowu, wuneno tim munero me lewic.

⁹ Wucito bot jok Molek ki moo, wumedo moowu ma ŋwece kur onya odoko mabup; wuoro lukwenawu gucito ka mabor, wucwalogi bene gucito wa piny i lyel.

¹⁰ Wot mabor oolo komwu woko, ento pe wuwaco ni, “Konnye pe”; wunoŋo kwo manyen ma medo tekowu, omiyo pe wuwillee giwu i waŋayo,

¹¹ Aŋa ma onoŋo wulworo twatwal, ma omiyo komwu myel, ma oweko wuwaco lok goba, wiwu doŋ owil woko pewupo i koma, ma pe doŋ wutwero tamo pira? Pe atemo diyo cwinya pi kare malac, ma oweko pe wubedo ki lworo mo i koma?

¹² En kitwu ma wutamo ni tye atir-ri, ki gin ducu ma wutimo abituco woko ka maleŋ, ento magi ducu pe bikonyi.

¹³ Ka ce wukok matek pi kony, gin cal jogiwu-ni myero gularwu do! Yamo bitiŋogi terogi woko, aluu dog bicwalogi woko wa cen. Ento ŋat ma riŋo laro bota bileyo lobo, dok bene bibedo i kom got mera maleŋ.

Lubaŋa ocikke me konyo ki caŋo jone

¹⁴ Gibiwaco ni, “Wutor yo, wutor yo, wuyub yo, wuput ajut-gu woko liweŋ ki i yo pajona.”

¹⁵ Lubaŋa ma en ŋat Mamalo Twal, ma bedo nakanaka i kabedo ma otiŋŋe malo, ma bedo matwal, ma nyiŋe len-ni, owaco ni, “An abedo i kabedo maleŋ ma otiŋŋe malo, dok bene abedo kacel ki ŋat mamwol, ma cwinye cwer, dok ma ŋut, pi miyo kwo manyen bot jo ma cwinygi cwer dok ma giŋut,

¹⁶ Pien pe abibedo ka pyem nakanaka, dok bene kiniga pe bimaka kare ducu, pien cwiny dano oa ki bota, an aye ma amiyogi yweyo me kwo, amiyo bedo tye.

¹⁷ Bal pa jona ki paro lim aye oweko akeco; omiyo agoyogi, akanne woko, kun kiniga maka, ento gumedde ameda ki jemo kun gitiyo gin ma cwinygi mito.

¹⁸ Doŋ atyeko neno kitgi, ento pud abicaŋogi; abitelogi, abiculogi bene ki gin ma kweyo cwinygi, kun amiyo jo ma kumo pigi giloko lok me pwoc.

¹⁹ Abimiyo kuc bot jo ma tye ka mabor ki jo ma tye ka ma cok, dok bene abicaŋo jona.

²⁰ Ento jo maraco gubedo calo nam ma twagge, ma pe koŋ twero pye mot, kun piine kelo yugi ki coto keken.

²¹ Kuc mo pe pi jo ma gin lutim maraco.” Man lok ma Lubaŋawa owaco.