Icaya 52 - Acoli Baibul

Lubaŋa bilaro Jerucalem ki i opii

¹ Co woko, co woko ki i waŋ nino, ruk tekoni, in Cion; ruk boŋŋini mabecone, in Jerucalem, gaŋ maleŋ, pien dano mo ma pe giliro, ki jo ma komgi ki keni, pe dok gibidonyo boti.

² Teŋ apwa woko ki i komi wek ia malo, in Jerucalem ma yam ibedo opii. Wugony tol woko doŋ ki i ŋutwu, wun jo Cion ma yam wubedo opii.

³ Pien Rwot owaco kuman ni, “Pe yam giculo lim mo me wilowu, dok bene pe gibiculo lim mo me kokowu.

⁴ Yam wuwoto wucito i lobo Ejipt macalo lubedo, lacen jo Aciria guunowu laboŋo bal mo.

⁵ Koŋ wunen kombeddi dok gitero jona woko i Babilon nonono; gitye ka ŋalo lulocgi, dano gitye ka cayo nyiŋa dyeceŋ jwi.

⁶ Pi meno jona doŋ gibineya, wubineyo ni an Lubaŋa, wubineyo ni an a en ma atye ka lok kwedwu.”

⁷ Neno tyene ber mada i wi godi, ŋat ma kelo lok maber, ma tito pi kuc, ma kelo lok maber me gin maber, ŋat ma tito lok me larre, ma waco bot Cion ni, “Lubaŋani tye ka loc.”

⁸ Koŋ iwiny, lukur gaŋŋi gitye ka wer ki dwan maloŋo, giwero wer me yomcwiny kacel; pien gitye ka neno Rwot ki wangi, kun tye ka dwogo cen i Cion.

⁹ Wumwoc ki wer lawaŋacel, wun ducu, wun wi obur Jerucalem; pien Rwot doŋ okweyo cwiny jone, doŋ okoko Jerucalem woko.

¹⁰ Rwot doŋ oyabo tekone maleŋ ka maleŋ i nyim rok ducu; dano ducu ma i wi lobo gibineno, kit ma Rwot Lubaŋawa olarowa kwede.

¹¹ Wua, wua woko, wua woko ki kunnu, pe wugud gin mo ma kome ki keni; wua woko ki kunnu, wek wucit wulonnye kekenwu, wun jo ma tino jami pa Rwot.

¹² Pe wubia oyotoyot ma komwu myel, pe bene wubiriŋo arina, pien Rwot bitelo nyimwu Rwot Lubaŋa pa Icrael bibedo i newu kun gwokowu cawa ducu,

Can pa latic pa Rwot

¹³ Rwot owaco ni, “Nen, tic pa laticca tye ka wot maber, gibiwore ci gitiŋe malo: en bibedo dano mamalo twatwal.

¹⁴ Jo mapol ma gunene gubedo ki ur matek; waŋe onoŋo nen pat mada ki waŋ dano, ki kome bene onoŋo pe rom ki kom dano.

¹⁵ En bipoyo kom rok mapol kit meno, luker ducu doggi bitwo woko pire; pien gibineno gin ma yam pe gitittigi pire, dok gibinian i gin ma yam peya guwinyo pire.”