Icaya 51 - Acoli Baibul

Lok me kweyo cwiny jo Jerucalem

¹ “Wuwiny lokka, wun jo ma wumito larre, wun jo ma yenyo Rwot; koŋ wunen got ma yam gipayowu ki iye, ki bur madit adada me gweŋ matek ma gikwinyowu ki iye.

² Koŋ wutam pi kwarowu Abraim, ki Cara ma obedodawu; i kare ma alwoŋo Abraim onoŋo pe tye ki latin mo, ento lacen amiye gum, ci onywalo litino, dok anyayo likwaye odoko mapol twatwal.

³ Pien Rwot bikweyo cwiny Cion; bikweyo cwiny kabedone ducu ma gibalo woko, tim ma iye bibedo calo Eden, ki tim aroo mutwo bibedo calo poto pa Rwot; yomcwiny madwoŋ bibedo tye kunnu, kun dano giwero wer me pwoc ki me pak.

⁴ “Wuwiny lokka, wun jona, wuter itwu wuwiny lokka, wun rokka; pien abimiyowu cik, ki ŋolo kop atir ma bibedo macalo cen bot lurok.

⁵ Kare me locca doŋ onyiko cok twatwal, larre ma abikelo tye ka bino, an ki koma aye abiloyo rok ducu; lobo ducu ma tye i dog nam gitye ka kura, gitye ki gen ni abilarogi.

⁶ Wutiŋ waŋwu malo i polo, dok wukul waŋwu piny wunen lobo; pien polo ma wuneno-ni biket woko macalo yito, ento lobo biti woko calo boŋo, ka doŋ jo ma bedo iye gito woko calo ober; ento larre ma abikelo biri nakanaka, locca pe bigik wacel.

⁷ “Wuwiny lokka, wunjo ma wuŋeyo kit ma atir, wun jo ma doŋ wumako cikka i cwinywu; pi meno pe wubed ki lworo kadi dano cayowu, cwinywu bene pe myero oballe ka ce giyetowu.

⁸ Pien nyenye bicamogi woko calo boŋo, okok bene bicamogi woko calo yer romo, ento locca pe bigik wacel, larrena bibedo pi yalwak me kare ducu.”

⁹ Co, co woko ki i waŋ nino, wek iruk teko, in ciŋ Rwot; co woko macalo i kare ma okato, ki lwak jo me kare macon. Pe in aye yam iŋolo Rakab iŋido woko matitino, icobo min kulu ineko woko?

¹⁰ Pe in aye ma yam imiyo pii ma i nam otwo woko, pii madit ma onoŋo yam tut twatwal-li; pe imiyo yo obaro dye nam matut ca, wek jo ma gikokogi gukat ki iye wa loka nam tuŋcel?

¹¹ io ma Rwot okokogi bidwogo i Cion, gibibino kun giwero wer. Yomcwiny ma ri nakanaka pe birwenyo ki i wigi, gibibedo ki yomcwiny madwoŋ, cwercwiny ki cur bia woko ki botgi.

¹² “An aye abedo ŋat ma kweyo cwinyi. Piŋo ilworo dano mamwa ma to woko-ni, latin pa dano ma giketo calo lummi?”

¹³ Piŋo wii owil woko i kom Rwot ma oketi, ma oryeyo polo, dok bene ma ocibo te guti me lobo? Piŋo kono ibedo ki lworo nakanaka nino ducu, pi akemo malyet pa jo ma giuno dano wadigi, ka ce gucako ticgi me neko dano? Akemo malyet pa ŋat ma uno dano-ni kono tye kwene?

¹⁴ ŋat ma onoŋo gitweyo macalo mabuc gibigonyo woko oyotoyot; en pe bito donyo piny i bur lyel, cam bene pe biremme.

¹⁵ Pien an a Rwot Lubaŋani, ma tugo pii ki i nam, miyo twagge kun mor, nyina Rwot me mony.

¹⁶ Doŋ atyeko keto lokka i dogi, akano waŋi woko bene doŋ i tipo ciŋa, aryeyo polo, aketo te guti me lobo, awaco bot jo Cion ni, ‘Wun wujona.’ ”

¹⁷ Co woko ki i waŋ nino, co woko, a malo, in Jerucalem, in ma doŋ imato kikopo me akemo ma Rwot aye omiyo boti, i kare ma imato ducu, ci icako tagge.

¹⁸ Pe tye ŋat mo ma twero peye, i kin litinone ducu ma en onywaloni; pe tye ŋat mo ma twero mako ciŋe, i kin litino ducu ma en opitogi.

¹⁹ Can magi aryo-ni ducu opoto i komi lawaŋ acel, aŋa ma binywako kumo pi can magi kacel kwedi? Giyako loboni gibalo woko liweŋ, kec ki neko dano opoto iye magwa; man aŋa ma bikweyo cwinyi?

²⁰ Awobeni guwille woko, gubuto piny liraba ka ma yo ogik iye ducu, calo til ma omoko ki obwo; akemo pa Rwot doŋ oketo komgi woko, ki juk ma Lubaŋani obedo ka jukogi kwede.

²¹ Pi meno, wun jona ma giunowu doŋ wuwiny lok man, wun jo ma wumer, ento pe wumer ki koŋo vino.

²² Rwot Lubaŋawu ma pido lok pa jone owaco kuman ni, “Nen, doŋ atyeko kwanyo kikopo woko ki i ciŋwu, en kikopo ma miyo wumer wutagge-ni; agulu me akemona pe dok wubimedde ki matone.

²³ Doŋ abimiyo i cin jo ma unowu, ma yam doŋ guwaco botwu ni, ‘Wuryebbe piny wek wukati’; omiyo wuloko ŋewu doŋ odoko ŋom me anyonagi, dok ŋewu onoŋo doŋ tye macalo yo ma gilubo.’