Icaya 5 - Acoli Baibul

Carolok i kom poto olok

¹ Wek koŋ awer wer bot ŋat ma amaro-ni, wer me mar i kom poto olokke. Ŋat ma amaro-ni onoŋo opuro poto olokke i wi cere ka ma ceko cam twatwal.

² Oboto poto, ka doŋ oteno, ocoko gweŋ bene woko ducu ki iye ka doŋ ocako pito iye olok mabeco ma oyero ayera; oketo lubele me neno pinyi dyere, ka dok okwinyo bur tye me jolo pige. En doŋ ocako bedo ki gen ni binyako nyige mabeco, ento dok onyako mere nyige calo olok me tim.

³ Kombeddi doŋ, wun jo ma bedo i Jerucalem, ki wun jo me Juda, wutim ber wuŋol kop, i kin an ki poto olokka.

⁴ Gin aŋo madog ma onoŋo myero atim i poto olokka ma pe atimo? I kare ma abedo ki gen ni olok binyako nyige mabeco, piŋo dok onyako mere nyige calo olok me tim?

⁵ Wuwek koŋ doŋ atit botwu, gin ma abitimo i kom poto olokka. Abimuko cel woko ki i ŋete, wek doŋ oballe woko; abicoro lobo me celle areto woko piny, wek lee onyon lobo ma iye woko atata,

⁶ Abibwoto bakke ki doo liyuk, pe doŋ abiŋolo jaŋe, kadi wa doyo tere, okuto ki ocok bitwi, ci gidoŋo iye; abiciko pol ducu wek pe dok gumi kot ocwer iye.

⁷ Pien poto olok pa Rwot me mony, gin aye jo Icrael; ki jo Juda. Gin ducu gubedo gin ma en opito me yomo cwinye; onoŋo en tye ki gen ni Gibiŋolo kop atir, ento koŋ inen, gitye ka nekke woko kekengi; onoŋo tye ki gen ni gibibedo jo ma kitgi atir, ento koŋ iwiny, twon koko me can ma gikok kwede!

Can ma bipoto i kom jo maraco

⁸ Gibineno can, jo ma kubo odi i kom odi wadigi, ma gimedo potti i kom potti ma gitye kwede, nio waŋ ma ka mo doŋ pe odon ki jo mukene, kun noŋo doŋ gudoŋ kengi i lobo.

⁹ Rwot me mony okwonne ma awinyo ni, “Adada, odi mapol igi bidoŋ noŋo, odi madoŋo, mabeco bidoŋ laboŋo ŋat mo ma bedo i igi,

¹⁰ Poto olok eka apar, bia iye koŋo vino ma romo debe aryo keken; ki kodi kutiya adek kulu, bia iye debe aryo keken.”

¹¹ Gibineno can, jo ma puk odiko con, ka yenyo koŋo arege me amata, ki jo ma ri i te koŋo nakanaka wa dyewor, nio wan ma gumer matek.

¹² Gibedo ki opuk, nana, ajaa ki nyamulere i karamagi, kun koŋo bene pe lwenyo iye; ento pe giparo pi tic ma Rwot otiyo wacel, kadi wa loko wangi me neno gin ma en otiyo ki ciŋe.

¹³ Meno aye gin mumiyo gitero lwakka i opii pi kwiya pinygi; co mogo i kingi ma giworo kombeddi gitye ka to ki kec, ki lwakgi mapol orwo pii onekogi matek.

¹⁴ Meno omiyo lyel tye ka mwonyo laa twatwal, kun oŋamo doge malac mukato kare, deyo pa Jerucalem ki lwak jone gidonyo iye, jo ma wo ma cwinygi yom bene.

¹⁵ Gikwanyo doŋ dit pa dano woko, co doŋ gudoko jo ma rwomgi piny adada, jo ma lyerre bene doŋ wakkegi ogik.

¹⁶ Ento Rwot me mony dit dok gidwore pi ŋolo kop atir, Lubaŋa Maleŋ nyutte ni elen i timo gin ma tye atir,

¹⁷ Romi gibibedo ka cam i Jerucalem macalo gicamo i oletgi, dok lim makwo mucwe ki dyegi gibicam i wi obur.

¹⁸ Gibineno can jo ma ywayo kit marac ki tol me goba, ma giywayo bal macalo tol ma ywayo gadigadi,

¹⁹ ma giwaco ni, “Wek en oru timone oyotoyot, wek oti ticce bene oyotoyot twatwal, wek wanen; wek gin ma Gat Maleŋ me Icrael oyubo ni ebitiyo obin cok, obin, wek wan bene waŋe.”

²⁰ Gibineno can, jo ma lwoŋo gin marac ni ber, kun dok gilokke gilwoŋo gin maber ni rac, ma giketo colpiny ma ka leŋo, ki leŋo ma ka colpiny, gin makec giloko doko gin malim, ki gin malim giloko doko gin makec!

²¹ Gibineno can, jo maryek i wangi kengi, jo ma nenne kengi ni giryek.

²² Lumat koŋo madoŋo bineno can, ki jo ma gin ludiro i rubo boŋo mamit,

²³ ma gimiyo ŋat mubalo loyo kop pi lim ma owilogi kwede i muŋ, ma pe dwoko jami pa ŋat ma pe ki bal mo cen bote.

²⁴ Pi meno kit macalo leb mac wano kwede ren kal, ki kit ma lum mutwo mac gamo kwede, gin bene gibibedo macalo yat ma otop woko, nyo macalo yat ma ka ture otwo ci duny calo apwa: pien gukwero winyo cik pa Rwot me mony, kun gicayo lok ma ŋat Maleŋ me Icrael oloko.

²⁵ Meno aye gin mumiyo akemo omako Rwot i kom lwakke, omiyo en oryeyo cine i komgi, ci onekogi woko; godi madoŋo guyeŋŋe, guto ma noŋo komgi oradde ata macalo yugi ma tye i dye gudo. Man ducu pe, okweyoakemopa Rwot en pud tye ka ryeyo ciŋe aryeya i komgi.

²⁶ En bitiŋo benderane pi rok ma tye ka mabor, bilwoŋogi ki i agikki piny ki lwiyo; nen gin ca, gitye ka riŋo, gibino oyotoyot.

²⁷ Dano mo muni ma tye ka gwanne atata pe i kingi, ŋat ma nur ki nino nyo ma onino pe i kingi, ŋat mo pe ma boŋo ma i pyere ogony woko, tol war bene pe ocot ki i tyen ŋat mo.

²⁸ Aterogi bit twatwal, guciko atumgi ki tol ma doŋ gutelo woko matek, obon tyen aguraguragi obedo calo pata got, tyen gadigadigi wirre calo yamo lapiru.

²⁹ Gin ducu gimor calo dwan labwor ma kok, gikok calo litino labwor; ginur ci gimako lee ma gitye ka dwarone, giywayo giterogi gigi laboŋo ŋat mo ma twero kwanyone woko ki botgi.

³⁰ Gibinur i kome i nino meno, macalo nam ma mor. Ento ka ce iloko waŋi me neno lobo, ci ibineno colpiny ki can keken, kun noŋo pol oumo wan cen woko.