Icaya 48 - Acoli Baibul

Gin manyen ma bitimme

¹ Koŋ wuwiny man, wun jo me ot pa Yakobo, ma gilwoŋowu ki nyiŋ Icrael, wun likwayo pa Juda, Wun wukwoŋo kwoŋ I nyiŋ Rwot, kun wutuco bene nyiŋ Lubaŋa pa Icrael, ento pe i ada, dok pe i yo ma atir.

² Ento gilwoŋŋe kengi ni gin jo me gaŋ maleŋ, dok gijeŋŋe i kom Lubaŋa pa Icrael, ma nyiŋe Rwot me mony.

³ “Yam atito con gin ma bitimme i-anyim, lokke yam okatti ki i doga, ci amiyo dano guŋeyo woko; aruyugi me timme oyotoyot, ci bene otine ocobbe kakare.

⁴ Pien onoŋo aŋeyo ni cwinywu nwaŋ, kun wujino-ler ŋutwu woko bene matek calo nyonyo, dok tur nyimwu bene obedo macalo mola;

⁵ en mumi yo yam atittiwu lokke con, atuco lok man botwu con ma peya otimme, wek ka otimme pe wuwac ni cal jogiwu aye mutimo, kun wumedde ki waco ni cal apayawu ki cal ma wuliyo aliya ki mac aye ma guwaco ni otimme.

⁶ “Doŋ wutyeko winyo lok man, kombeddi doŋ wuneno gin magi ducu; pe wubitito pire? Cakke kombeddi cito kwede anyim abimiyo wuwinyo jami mogo manyen, gin mukene ma pe wun wuŋeyo kadi acel.

⁷ Pud amiyo timme kombeddi, pe con twatwal; peya yam wuwinyo pigi kadi ki acel, wek pe wuwac ni yam onoŋo wuneyogi con.

⁸ Peya yam wuwinyo pigi, dok bene peya onoŋo wuŋeyogi, cakke wa con itwu onoŋo pud odiŋ woko. Pien onoŋo aŋeyo woko ni wubibedo ki tim aranyi me goba, dok bene cakke wa ki i ic, onoŋo wubedo jo ma lujemo.

⁹ “Koŋ abimiyo kinigana galle pi nyiŋa, koŋ abijuko kinigana woko piwu wek dano gupaka, wek pe atyekwu woko.

¹⁰ Nen, doŋ atyeko Iiyowu woko, ento pe macalo ryal, atemowu i mac buk me can magwa adada.

¹¹ Man atimo pira kena, atimo pira kena, atwero weko gipyedo nyiŋa niŋniŋ? Pe atwero miyo deyona wacel bot lubaŋa mo mukene. Rwot bikoko jo Icrael

¹² “Wuwiny lokka, wunjo pa Yakobo wun jo Icrael ma an alwonowu. An a en, an aye abedo mukwoŋo dok abedo me agikki,

¹³ An aye ma aketo te guti me lobo ki ciŋa, ayaro polo ki ciŋa lacuc; ka alwoŋogi, ci gin ducu a kacel.

¹⁴ “Wun ducu wugurre kacel, wek wuwiny lokka. Aŋa i kingi ma otito ni gin magi bitimme? ŋat ma an Rwot amaro en aye abioro me cobo yubba i kom Babilon, en bilwenyo i kom jo Kaldaya.

¹⁵ An gira, an kikoma doŋ aloko, dok bene doŋ atyeko lwone woko, doŋ akele, nyime bibedo leŋ, bibedo bene maber.

¹⁶ Wunyik cok bota kany, wek wuwiny: cakke i acakki piny, pe aloko gin mo i muŋ, cakke i kare ma ocako timme, onoŋo atye kunnu.” Kombeddi Rwot Lubaŋa doŋ oora ki Cwiny Maleŋ.

¹⁷ Rwot ma en ŋat Maleŋ me Icrael, ma en aye okokowu ki i opii, owaco kuman ni, “An a Rwot Lubaŋawu amito pwonyowu wek wubed maber, kun atelowu i yo ma myero wuwot iye,

¹⁸ Kono yam wubedo ka winyo cikka, kono ber! Kono kucwu omol calo kulu ma moljwi, kono wuloyo lok calo nam ma piine mol laboŋo yweyo-ni.

¹⁹ Likwayowu kono calo kweyo, dano ma gua ki i komwu kono doŋ gidwoŋ calo apwa; kono nyiŋgi pe orwenyo kadi ki acel, kono bene pe gijwerowu woko liweŋ ki i nyima.”

²⁰ Wua woko ki i Babilon, wurin woko ki bot jo Kaldaya, wunyut lok man kun wugoyo kijira, dok wutit pire bene, wucwallokke ocit wa i agikki piny, kun wuwaco ni, “Rwot doŋ okoko laticce Yakobo woko!”

²¹ I kare ma en obedo ka telogi i tim, orwo pii pe onekogi matek; omiyo pii otuc omol pigi, kun a ki i kom pata got, obaro got ci pii onyette woko ka maleŋ.

²² “Kuc pe pi jo ma gin lutim maraco” Man lok ma Rwot owaco.