Icaya 47 - Acoli Baibul

Ŋolo kop i kom Babilon

¹ Rwot owaco ni, “In Babilon ma imwonya mada, in gaŋ pa jo Kaldaya ma irom ki nyako ma peya oneyo laco mo, bin ilor piny ibed i apwa! Bed piny i nom, pe i wi komker! Pien pe dok gibiwaco ni, in iyom twatwal, pe iromo tiyo gin man.

² Kwany nya kidi wek ireg moko, gony kitambara woko ki i wii, luny boŋoni mabor-ri woko wek tyeni odoŋ noŋo, ŋol ki i dye kulu ikat loka tuŋcel.

³ Ibidoŋ munero, komi ma myero pe onen doŋ binen ka maleŋ. An doŋ aculo kwor, pe abiweko dano mo bwot kadi ki acel.”

⁴ Ŋat ma kokowa nyiŋe Rwot me mony, en ŋat Maleŋ pa Icrael.

⁵ Wubed ma Wuliŋ mot, kun wutye i piny macol, wun jo Kaldaya; pien pe doŋ gibilwoŋo gaŋwu ni mego ma loyo rok mapol.

⁶ Kiniga yam omaka i kom jona, amiyo gubedo calo gin kipyeda; amiyo gubedo i te locci, ento kica pe omaki i komgi wacel; okol ma itweyogi kwede obedo mapek twatwal bot jo muteggi.

⁷ Onoŋo iwaco ni ibibedo ka loyo rok mapol nakanaka, omiyo pe giri iketo cwinyi i lok magi, kadi po pi kit ma bigik kwede bene pe ipo,

⁸ Pi meno winy lok man, in ma imaroyomcwiny twatwal-li, ibedo ka ramo ni pe tye ŋat mo ma rom kwedi, dok ni pe ibibedo macalo dato nyo ni kadi ki litinoni bene pe bito.

⁹ Kit can aryo-nu ducu bipoto i komi, i nino acel, i dakika mo manoknok; to pa litino ki doko dato, gin ducu bipoto i wii lawaŋacel magwa, kadi bed itim lwak tim jokjok mapol ata, kadi bed doŋ it yet tyet ma rom mene.

¹⁰ In noŋo doŋ itamo ni it ye ki kuc i kom tim maraco ma ibedo ka timone-gu, kun itamo ni ŋat mo pe ma neni, Ryekoni kacel ki ŋec ma it ye kwede gubedo ka rwenyi arwenya, ibedo ka tamo ki i cwinyi ni pe tye ŋat mo ma rom kwedi.

¹¹ Ento gin marac bipoto i komi, ma pe itwero timo gin mo mejukone. Can bipoto i komi, ma pe ibitwero kwanyone wacel; to bene bipoto i komi oyot mada, ma in pe iŋeyo iye gin mo,

¹² Cuŋ matek i tyet dok imedde ki timo tim me jokjok, ma yam ibedo ka timone cakke wa i tinoni; gwok nyo man twero konyi i yo mo, nyo bene twero miyo dano gilwori.

¹³ Tekoni doŋ otum woko, kadi bed gitye ka miyo boti tam twatwal; koŋ gin doŋ gubin gulari, gin jo ma ŋeyo poko polo, ki jo ma niyo lakalatwe kun giciko wangi malo ligan, jo ma ka i por dwe manyen ducu gitito gin ma bitimme i komi-ni.

¹⁴ Nen girom ki cuŋ kai, mac wanogi woko; pe gitwero laro kwogi pigi kengi, ki i tek me leb mac. Mac man pe obedo mac me aoya, pe bene mac ma gitwero bedo i ŋete.

¹⁵ Jo ma ibedo ka yelle kwedgi-ni tye kit meno ki tun boti, ma ibedo ka balo kareni botgi cakke wa ka tinoni. Gin ducu gibitenyi wokc ata liyak, kun ŋat acel acel cito i yone pat; ŋat mo ma bilari pe.