Icaya 46 - Acoli Baibul

¹ “Jogi pa jo Babilon doŋ cok gik woko! Bel ki Nebo ma yam giworo-ni, kombeddi doŋ gudoko gin ma lee tiŋo, man doŋ gudoko yec mapek twatwal ma miyo lee ol adada.

² Gin ducu doŋ gukulle piny, guguŋo kacel, cal jogi pe gitwero larre kengi; ento doŋ gimakogi woko gimito terogi i opii.

³ “Wuwiny lokka, wun jo me ot pa Yakobo, wun jo ma wudoŋ i ot pa jona Icrael. Abedo ka gwokowu cakke wa ki i i megiwu, atiŋowu cakke i kare ma ginywalowu,

⁴ An Lubaŋawu ma bigwokowu, abigwokowu nio waŋ ma wuti; abibedo ka tiŋowu kadi wa i kare ma noŋo lwar doŋ otwi i wiwu. An aye ma aketowu dok agwokowu bene, abikonyowu, dok abilarowu.

⁵ “Wupora ki aŋa mono? Tye ŋat mo ma rom kweda? Wupora do wek wabed calcal.

⁶ Jo ma jobo jabu ajoba ki i kicaa Em, ma gipimo ryal ki mijan, giculo lim bot latet jabu wek oti botgi cal jok, ka doŋ giryebbe piny i nyime ka worone.

⁷ Gitiŋo giketo i wi gwokgi, gicibo i kabedone, ci cuŋ iye matwal, kun pe twero a woko kene ki i kabedone-nu. Ka dano mo kok bote pi kony, en pe gamo doge, pe laro dano meno ma okok bote i kare me canne.

⁸ “Ber wupo i kom lok man, wun lubalo; koŋ wutam, wulwod lokke ki i cwinywu,

⁹ Wupo i kom gin ma yam otimme con, pien an Lubaŋa kena, pe dok tye mo mukene ma cal kweda.

¹⁰ Cakke con i acakki piny, anyuto kit ma gin ‘man bitimme kwede woko, ki kit ma bigik kwede bene. Awaco ni gin ducu ma ayubo bicobbe, dok abitimo gin mo keken ma ayubbe me tiyone.

¹¹ Abilwoŋo dano calo acut ki yo tuŋ wokceŋ; dano meno bia ki ka mabor, me cobo gin ma doŋ atyeko yubo con. Doŋ aloko, dok abicobone, doŋ atyeko yu bone, dok bene abitimo.

¹² “Wuwiny lokka, wun jo ma cwinywu nwaŋ, wun jo ma wutamo ni larre bor kwedwu twatwal.

¹³ Nino ma abilarowu iye doŋ cok, pe doŋ bor wacel, pe abigalle me laro dano, abilaro Cion, pi Icrael ma anoŋo deyona pire.”