Icaya 45 - Acoli Baibul

Rwot oketo Ciro me bedo laloc ma kakare

¹ Rwot owaco ni, Ciro doŋ odoko kabaka ma doŋ atyeko wirone ki moo, amako ciŋe ma lacuc aketo en me loyo rok mapol, acwale wek ocit otur teko pa luker woko, atye ka yabo nyime ma pe dok biumme.

² Rwot owaco bot Ciro ni, “Abitelo nyimi, abiyubo yo bedo mapwot piri, abituro doggola ma gitiyo ki mola woko liweŋ, abitoŋo nyonyo rii me dogcel-gu aturo woko bene,

³ Abimiyo boti lim ma gikano ka macol, ki jami mogo ma gikano i kabedo ma tye i muŋ, wek iŋe ni an Rwot Lubaŋa pa Icrael, an aye ma atyeko yeri dok alwoni ki nyiŋi,

⁴ Aketi ni ikony laticca Yakobo, jo Icrael ma gin jona, meno aye gin mumiyo ayeri; alwoni ki nyiŋi, amiyi nyiŋ pak kadi bed pe iŋeya.

⁵ “An keken aye abedo Rwot, pe dok tye Rwot mo mukene, Lubaŋa mo mukene bene doŋ pe kono an keken; abimii teko kadi pe ineya,

⁶ Man atimo wek dano guŋe ni an kena aye a Rwot, cakke ki i but lobo tuŋ potoceŋ o kwede tuŋ ka mukene, pe dok tye lubaŋa mo mukene kono an keken.

⁷ An aye ma aketo leŋo ki colpiny, amiyo kuc bedo tye ki can bene bedo tye, an Rwot aye ma atiyo jami magi ducu.

⁸ Abionyo loc o piny i lobo kun a ki i polo, abimiyo cwer calo kot, lobo biyabbe pi gamo larrre, dok bedo ki kit ma atir bene bicakke i lobo; an Rwot abimiyo lok man timme ada.

Rwot aye ma oketo jami ducu

⁹ “Dano ma pyem ki Lubaŋa ma okete bineno can. Agulu lobo twero pyem ki ŋat ma ocweye? Lobo twero penyo lacwe agulu gin ma en tiyo? Nyo agulu twero waco bot lacwe agulu ni pe gitiye maber?

¹⁰ Latin ma penyo wonne ni, ‘In inywalo aŋo?’ latin-nu bineno can; nyo ma penyo minne ni, ‘Gin aŋo ma miyo it ye ka winyo arem me nywal?’ ”

¹¹ Rwot, en ŋat Maleŋ ma oketo Icrael, owaco kuman ni, “Wun pe wuromo penya lok i kom litinona, dok bene pe wutye ki twero mo me titta gin ma myero ati.

¹² An aye ma aketo lobo, ka doŋ aketo dano me bedo iye: aryeyo polo obedo tye kit macalo tye kwede-ni pi tekka, an bene aye ma aciko jami ma i polo ni gubed kit macalo gitye kwede-ni.

¹³ An aye ma aketo Ciro i ticce me loc, abimiyo en cobo tic ducu kakare, en bigero gaŋŋa, dok bigonyo jona woko ki i opii, pe pi cul nyo kadi pi pwoc mo ma abimiyo bote.” Man lok ma Rwot me mony aye owaco.

¹⁴ Rwot owaco ki Icrael ni, “Lonyo ducu me. Ejipt ki jami acata ducu me Etiopia, gin ducu bidoko meri, ki jo Seba ma gin twoni jo maboco, gin ducu gibibino boti ci gidoko opiini, gibilubo kori ma noŋo doŋ gitweyogi woko ki nyor, gibiryebbe piny i nyimi ka wori. Gin ducu gibimwolle woko i nyimi kun giwacci, ‘In keken giri aye it ye ki Lubaŋa, in keni, lubaŋa mo mukene doŋ pe kono meri-ni keken.’ ”

¹⁵ Ada, in aye ibedo Lubaŋa ma kanne woko, ai Lubaŋa pa Icrael, in aye ma ilaro dano.

¹⁶ Lewic bimako jo ducu ma tiyo cal jogi, alee bitwodo gin ducu.

¹⁷ Ento jo Icrael Rwot bilarogi woko, lar ma en larogi kwede biri nakanaka; lewic pe bimakogi wacel, alee mo bene pe bitwodogi liweŋ.

¹⁸ Pien Rwot aye gire ma oketo polo, en bene aye ma obedo Lubaŋa! En ocako tic me keto lobo, ci otiyo otyeko, en omiyo ocuŋ omoko matek kakare. En yam pe oketo lobo ci oweko woko kun onyobbe atata, en oketo ni dano twero bedo iye. En Rwot aye ma owaco ni, “An a Rwot, pe dok tye Rwot mo mukene.

¹⁹ An yam pe aloko lok i muŋ, i lobo ma tye i piny macol, an gira yam pe awaco bot likwayo pa Yakobo ni, ‘Wubiyenya i kabedo ma obedo atata.’ An Rwot aloko lok ada, dok anyuto gin ma tye kakare.”

Rwot ki cal jogi me Babilon

²⁰ Rwot owaco ni, “Wucokke kacel, ci wubin, wubin wunyik cok, wun jo me rok mapatpat ma doŋ wubwot. Jo ma bedo ka tiŋo cal jogi ma gipayo apaya gin jo ma pe giniaŋ gin mo kadi ki acel; gubedo ka lego cal jok ma pe twero larogi-ni.

²¹ Wubin wunyut lokwu i kabedo me pido; wek jo ma pido gupennye kengi. Aŋa ma oweko lok man oŋene cakke i kare macon? Pe an Rwot aye ma ceŋ atimo? Pe dok tye lubaŋa mo mukene kono an keken, an aye Lubaŋa ma kite atir, ma laro dano, pe dok tye mo mukene kadi ki acel.

²² “Wulokke wubin bota, wek alarwu, wun jo ma bedo i wi lobo ducu! Pien an Lubaŋa kena, pe tye mo mukene.

²³ An doŋ atyeko kwoŋŋe ki nyiŋa kena, lok ma aloko tye atir; lok meno pe bipoto piny i ŋom ma noŋo pe ocobbe. ‘Jo ducu gibirumo coŋgi i nyima, dano ducu gibikwoŋo kwoŋ ki nyiŋa.

²⁴ “Dano gibiwaco ni, kit ma atir ki tek gire noŋŋe ki bot Rwot; jo ducu ma yam cwinygi obedo ka waŋ i kom Rwot, gibibino bote ma noŋo lewic makogi mada.

²⁵ Likwayo Icrael ducu gibiloyo kop pi Rwot, ci gicako doŋ bedo ki deyo.”