Icaya 40 - Acoli Baibul

Lok maber pi Cion

¹ Wukwe cwiny lwakka, wukwe cwinygi! Man lok ma Lubaŋawu owaco.

² Wucuk cwiny jo Jerucalem, wuwac botgi ni, karegi me bedo opii doŋ ogik woko, doŋ gityeko timo kica botgi i kom balgi ducu. Can ma Rwot oketo i komgi obedo dit mada, rom ki bal ma gutimo tyen aryo kulu.

³ Dwan dano mo ma daŋŋe i tim ni, “Wuger yo pa Rwot, wutir yone ocuŋ atir i tim aroo pi Luban awa.

⁴ Luŋ ducu gibitoro woko, godi ki cere ducu gibidwokogi woko piny, ka ma ogonne gibitiro cuŋ atir, dok yo ma obedo burbur gibipiro woko,

⁵ Deyo pa Rwot doŋ binen ka maleŋ, dano ducu bineno kacel, pien Rwot kikome aye ma doŋ owaco.”

⁶ Dano mo’ tye ka waco ni, “Daŋŋe!” Cutcut agamo ni, “Imito adaŋŋe niŋniŋ?” Gin mo ducu ma tye ki kom obedo calo lum, berre ducu rom ki ber pa ature me tim.

⁷ Lum ner, ature bene o woko, ka Rwot okuto iye ki yweyone; ada, dano mere gical ki lum.

⁸ Lum ner, ci aturene o woko, ento lok pa Lubaŋa bedo matwal,

⁹ In Cion ma ikelo lok maber, it malo i wi got mabor. In Jerucalem ma itito lok maber-ri, med dwani malo ki tek, med dwani malo, pe ilwor. Wac bot jo ma bedo i gaŋ me Juda ni, “Wunen Lubaŋawu ba!”

¹⁰ Wunen Rwot Lubaŋawu tye ka bino ki tek, bade aye ma tye ka loc pire; nen, baka cicee tye bote, cul me ticce bene tye i nyime.

¹¹ En bikwayo romine calo lakwat, bitiŋo litino romine i bade, en bitiŋogi i kore, ci mako litino romi ma dot, peyogi motmot.

Pe tye gin mo ma giromo poro ki Lubaŋa pa jo Icrael

¹² Aŋa ma yam koŋ opimo pii i dye ciŋe, dok ma opimo polo ki ciŋe? Aŋa ma ojobo apwa me lobo ci oonyo i gi-pimo jami, nyo ma yam opimo godi i mijan, ki ka ma obedo cerecere i ratili?

¹³ Aŋa ma yam koŋ obedo ka’ telo Cwiny Rwot, nyo aŋa ma yam koŋ obedo ka miye tam macalo lapwony mere?

¹⁴ Aŋa ma yam koŋ Rwot onoŋo tam ki bote, nyo aŋa ma opwonye ki ŋolo kop atir? Aŋa ma yam koŋ opwonye me medo ŋecce, nyo ma onyutte yo me bedo ki niaŋ matut?

¹⁵ Nen rok ducu rom ki pii ma oton kicel i agulu, dok gikwanogi macalo apwa ma tye i mijan; nen, en tiŋo cula woko ki i dye nam calo gin matidi mo.

¹⁶ Yen ducu ma gitoŋo ki i buŋa me Lebanon, pe romo waŋo gitum awaŋa, lee ma tye iye bene nok, pe giromo me atyera bot Lubaŋa,

¹⁷ Rok ducu pe gin mo i nyime, gin ducu pe gubedo gin mo ki tun bote, gin ducu mwa.

¹⁸ Doŋ ibiporo Lubaŋa ki aŋa, nyo itwero poro calle ki kit cal aŋo?

¹⁹ Cal jok ma gitwako atwaka, latet t wero twakone, layub jabu mwono kome woko ki jabu, dok tiyo nyor ryal pire.

²⁰ Ŋat ma can odiyo adada, yero yat matek ma pe top me gityer, yenyo lapac ma ladiro, wek opane cal apaya, ma pe dok giromo kwanyone ki ka ma giketo iye.

²¹ Pe wuŋeyo bo? Yam peya wuwinyo? Yam onoŋo pe gitito botwu pire con? Peya wuniaŋ nia wa i acakki keto lobo?

²² ŋat ma bedo i wi komkerre malo en aye ma oketo, en bedo wa malo twatwal i ŋe pol, jo ma bedo piny i lobo ginen matino calo ocene. En ryeyo polo calo boŋo kicika, dok yaro bene calo kema me bedo iye.

²³ En miyo luloc me lobo gidoko gin ma konygi pe, en dwoko rwodi ducu me lobo woko piny lirwap.

²⁴ Gin gubedo calo ginapita ma pud gipito apita, ma pud gicoyo acoya kun guryeyo Lwitgi pud aryeya i ŋom, ma ka Rwot ocwalo yamo i komgi ci giner woko; ka ce yamo lapiru okodo i komgi, ci tiŋogi calo cuŋ kal terogi woko.

²⁵ Doŋ wubipora ki aŋo mono, wek abed cal kwede? Man peny ma ŋat Maleŋ openyo.

²⁶ Koŋ wutiŋ waŋwu malo wunen polo, aŋa ma oketo jami magi? ŋat ma telo monygi, ŋeyo welgi ducu, dok bene lwoŋogi ki nyiŋgi, Tekone dwoŋ twatwal, meno aye gin mumi yo mo ki i kingi pe rwenyo.

²⁷ Piŋo it ye ka koko, in Yakobo? Piŋo kono it ye ka waco ni, Rwot pe neni, in Icrael, kun iwaco ni Lubaŋa tika pe tye ka paro piri?

²⁸ Pud pe wuŋeyo bo? Yam peya wuwinyo? Rwot en Lubaŋa ma bedo nakanaka, en aye ma oketo wi lobo ducu. En pe ol, pe bene doko goro; ŋecce tut ma pe wacce, kadi tato tere bene pe twerre.

²⁹ En miyo tek bot jo magoro, dok bene medo tek bot ŋat ma tekone odok woko piny,

³⁰ Kadi ki awobe bene gitwero doko goro, gitwero ol bene ma giromo poto woko piny;

³¹ ento jo ma neno bot Rwot, teko bidwogo cen i komgi. Gibituk gicito malo calo ocur, gibiriŋo ma pe giol, gibibedo ka wot nakanaka ma komgi pe biloc.