Icaya 38 - Acoli Baibul

Two pa kabaka Kejekia ki cagge

¹ I kare meno two omako Kejekia ma onoŋo cok to woko. Lanebi Icaya wod pa Amoj ocito bote owacce ni, “Rwot owaco ku man ni, ‘Yub odi obed maber pien ibito woko, twoni pe bicaŋ.’’’

² Kejekia oloko waŋe i kom kicika ot olego Rwot,

³ kun wacci, “Tim ber, ai Rwot, koŋ ipo, inen kit kwo ma abedo kwede i nyimi, kun abedo ŋat ma geni, alubi ki cwinya ducu, kun abedo ka tiyo gin ma nen maber i waŋi.” Ci Kejekia ocako koko matek twatwal kun cwinye cwer.

⁴ Cutcut lok pa Rwot dok obino bot Icaya kun wacce ni,

⁵ “Cit iciwac bot Kejekia ni, Rwot Lubaŋa pa kwarowu Daudi owaco kuman ni, ‘Atyeko winyo legani, dok bene aneno pig waŋi; nen, abimiyo dok pud ibedo i lobo pi mwaka apar wiye abic.

⁶ Abilari kacel ki gaŋ man ki i cin kabaka me Aciria, dok bene abigwoko gaŋ man.

⁷ “Man larien ma binyuto ni Rwot bitiyo gin ma otyeko ciko pire:

⁸ En bicoro tipo cen dok cen tyen apar i kom gin me poro cen pa Akaj.” Tipo cen bene odok cen tyen apar kulu ma onoŋo okato i kom gi-porone,

⁹ I Kare ma doŋ Kejekia ocan ki i twone, ocako coyo wer man me pako Lubaŋa:

¹⁰ Yam onoŋo atamo ni abito ma noŋo pud atektek, atamo ni onoŋo doŋ icwala woko i lobo pa jo muto, ka cito ka bedo kunnu doŋ matwal, kun pe aneno neya.

¹¹ Onoŋo yam atamo ni pe doŋ abineno Rwot, i lobo pa jo makwo; pe dok abineno dano mo, ki i kinjo ducu ma gibedo i wi lobo.

¹² Doŋ onoŋo giputo kwona woko, gitero ka mabor, calo kema pa lakwat ma giputo woko, adolo kwona woko calo lacwe-bono ma odolo, ma oŋolo woko ki i kom yat lacwe-boŋo. Rwot, onoŋo doŋ imiyo kwena-ni ogik woko, cakke odiko o kwede wa i dyewor.

¹³ Akok dyewor benebene pi kony kun atye ki arem madit twatwal; en turo cogona woko ducu calo labwor. Rwot, onoŋo doŋ imiyo kwena-ni ogik woko,’ cakke odiko o kwede wa i dyewor,

¹⁴ Dwana onoŋo doŋ winnye calo lakalagwec ma kok, nyo owalu, onoŋo doŋ akok calo akuri. Waŋa onoŋo doŋ ojony woko ki ne no malo, giuna doŋ marac; ai Rwot, lara do!

¹⁵ An kone dok atwero loko gin aŋo? Pien oloko kweda, dok en kikome aye ma omiyo man otimme, i dyewor pe anino wacel, pi cwercwiny ma onoŋo atye kwede.

¹⁶ Ai Rwot; dano bedo kwo pi gin magi, an gira kwona ocuŋ i komi keken; cana woko wek abed kwo,

¹⁷ Nen cwercwiny madit ma onoŋo atye kwede, miya iye kuc; in aye ilaro kwona ki i dog bur me to, pien ibolo balla woko ducu yo tuŋ i neyi.

¹⁸ Pien pe tye ŋat mo i lobo pa jo muto, ma twero paki kun pwoyi bene; jo ma donyo piny i lyel pe dok gitye ki gen i kom adani.

¹⁹ Dano makwo aye twero pwoyi, kit macalo an tin apwoyi kwede-ni; won litino tito ki litinone, kit ma in igenne kwede.

²⁰ Rwot doŋ cok lara, wabigoyo naŋa ki opuk-gu ci wapaki kwede, wabiwero wer me paki i odi ka ma giwori iye, pi kare me kwowa ducu.

²¹ Icaya onoŋo owaco bot kabaka ni gilun nyig oduro ci gimwon i waŋ odekene, wek burre ocaŋ woko.

²² Kabaka Kejekia onoŋo openyo ni, “Kit lanen aŋo ma nyuto ni abicito i ot pa Rwot?”