Icaya 34 - Acoli Baibul

Rwot biketo can i kom lukworre

¹ Wubin wunyik cok, wun rok ducu wek wucik itwu wuwiny! Jo ducu ma bedo i lobo, myero gubin guwiny.

² Pien akemo doŋ omako Rwot i kom rok ducu, kiniga okete woko adada i kom monygi, en doŋ otenyogi wek gijwergi woko ki pala lucwan calo gineko lee.

³ Kom danogi ma doŋ gineko gibibolo woko ata, ŋwec komgi biduny maŋwe, remogi bene bimol i wi godi.

⁴ Lakalatwe me polo ducu bitop woko, polo bidolle woko calo buk adola. Monygi ducu bipoto woko piny, kit ma pot olok o kwede piny, kit ma pot oduro poto kwede piny ki i wi jaŋe,

⁵ Pien doŋ ayubo pala lucwanna woko ki i polo, abino piny ka ŋolo kop i kom jo Edom, i kom jo ma doŋ gimiyo me aneka.

⁶ Rwot tye ki pala lucwan ma remo opune woko i lake, moo dwolo bene doŋ odyako kome woko liweŋ, remo romi ki remo dyegi, moo dwolo olan pa nyogi romi. Pien Rwot bityero gitum i Bojra, dok bineko dano matek i lobo Edom.

⁷ Dano bitiŋŋe poto piny libut calo twonjubi. Lobogi bipoŋ ki remo ma mol liyakyak, dok moo dwolo bimiyo lobogi bedo ma miyu adada,

⁸ Pien Rwot tye ki nino me culo kwor, tye bene ki mwaka me koko Cion ki bot lukworre.

⁹ Kulu ducu me Edom bilokke doko calo odok Lam, lobone bene bidoko calo gweŋ calfa, doŋ lobo maca ducu bidoko calo odok Lam ma tye ka waŋ.

¹⁰ Mac bilyel dyeceŋ ki dyewor benebene ma pe to, yitone biduny mucido cito malo lituu nakanaka, I kare pa yalwak ducu lobo bidoŋ nono, dano mo pe ma biwok ki iye ma twal.

¹¹ Olwit ki coo bileyo ci doko megi, dok tula ki agak bene gibibedo iye. Rwot biryeyo tol i kome, miyo jebbe woko atata, ki birigi ma miyo doŋ noŋo ma kelo anyobanyoba i kom ludito ducu.

¹² Gibilwoŋo nyiŋe ni, Loc pe kunnu, dano madito bibedo pe iye.

¹³ Okuto bidoŋo i wi odine madito, ayila ki ocok bidoŋo i gaŋ gogone, too ki udu gibibedo iye,

¹⁴ Lee me tim birwatte ki lalur, cen mubedo calo dyegi bikok bot luwotgi, min lee muti ma nen dyewor keken bicito ka yenyo ka yweyo kunnu.

¹⁵ Tula bigero ode kunnu, ci bibolo iye toŋe, dok bitoko litinone bene ki kunnu, ka coko litinone woko i te bwome, Kwateŋ bene bicokke kunnu, kun acel acel i kingi tye ki cware,

¹⁶ Koŋ wuyeny wukwan ki i buk pa Rwot: pe tye mo i kin magi ma birwenyo, pe tye mo ma bibedo kene laboŋo cware. Pien Rwot doŋ ociko ni obed kit meno, en kikome aye bicokogi kacel.

¹⁷ En obolo kwir pigi, en kikome aye ma opoko botgi lobo kun pimo ki tel. Doŋ bibedo megi matwal, gibibedo iye i kare pa yalwak ducu.