Icaya 32 - Acoli Baibul

Kabaka ma kite atir

¹ Nen, kabaka biloyo loc ki kit atir, rwodine bene gibibedo i loc kun giŋolo kop atir.

² Ŋat acel acel bibedo macalo kagwok ka yamo tye, dok macalo ka-gwok ka kot ocorre piny, macalo kulu mapol ma piine mol i kabedo mutwo, dok macalo tipo got mo madit ma tye i lobo mutwo matar atara ligwek.

³ Jo ma neno piny pe gibiumo waŋgi, jo ma winyo bene gibiciko itgi,

⁴ Dano ma gitimo jami oyotoyot, gibiniaŋ iye dok gibiŋeyo maber, jo ma te lebgi odwalle biloko lok oyotoyot, dok atir laboŋo peko mo.

⁵ Ŋat mamiŋ pe gibilwoŋe ni dano me awora, ŋat ma kite rac bene pe gilwoŋo ni twon oteka.

⁶ Pien lamiŋ mere loko lok me miŋo, tamme tye me timo bal keken; gin ma en timo ducu pe yomo cwiny Lubaŋa, loko lok marac i kom Rwot; en dok medo kec amedda bot jo ma kec noŋo doŋ nekogi, dok twono jo ma orwo pii oneko woko ki pii me amata.

⁷ Dano ma kite rac, noŋo timme bene rac; en miyo tam me timo gin maraco, me balo lucan woko ki loko lok goba kadi bed lok pa ŋat ma can odiyo tye kakare.

⁸ Ento dano me awora kelo tam ma jo mukene woro bene, en cuŋ mere i kit me woro keken.

Giciko mon me Jerucalem

⁹ Wua malo, wun mon ma wutye ki kuc, wuwiny lokka; wuter itwu, wuwiny lok ma awaco, wun anyira ma pe wuparo gin mo-ni,

¹⁰ Nino ma odon pe dok romo mwaka acel, komwu bibedo ka po apoya, wun mon ma pe wuparo gin mo-ni; pien nyig olok bibedo pe, dok bene pe gibipwono nyig yadi.

¹¹ Wubed ki myelkom wun mon ma wutye ki kuc, komwu bene myero obed ka po apoya, wun ma pe wuparo gin mo-ni; wugony boŋŋi woko ki i komwu, wutwe boŋo cola i pyerwu.

¹² Wudoŋ korwu pi pottiwu ma yomo cwinywu, pi olok ma nyak matek twatwal,

¹³ pi lobo pa jona, ma okuto ki ocok bidoŋo iye; ki pi odi ducu ma gitye i gaŋ ma dano tye iye ki yomcwiny madwoŋ.

¹⁴ Pien kabaka bia ‘woko ki i ode, gaŋ ma dano pol iye bene bidoŋ noŋo; got Opel ki ka ma ocudo malo likuŋ me ŋiyo piny bidoko boro matwal; kana me tim cwinygi bibedo yom pigi, bidoko ka ma gikwayo iye romi ki dyegi;

¹⁵ nio waŋ ma Lubaŋa oonyo Cwiny Maleŋ i komwa kun a ki malo, ma noŋo tim bene doŋ odoko poto ma ceko cam mabup twatwal, kun poto ma yam ceko cam doŋ olokke odoko buŋa,

¹⁶ I kare meno ŋolo kop atir bibedo i tim, kit ma atir bibedo mere i poto ma ceko cam.

¹⁷ Kit ma atir bikelo kuc, dok bikelo bene bedo mot ki gen ma bedo nakanaka.

¹⁸ Jona bibedo i kabedo me kuc, ka ma ayela mo pe iye, kabedo maber me yweyo mot.

¹⁹ Pee bicorre, miyo buŋa ducu lwer o woko piny, gaŋ bene gijwero woko rwatrwat.

²⁰ Wutye ki yomcwiny, wun jo ma wucoyo kodi i dog kulu ducu, ma wumiyo twoni ki kana-gu giwoto ata.