Icaya 3 - Acoli Baibul

Ŋolo kop i kom jo Juda ki jo Jerucalem

¹ Pien, koŋ inen, Rwot, ma en Rwot me mony, tye ka kwanyo woko ki bot Jerucalem ki jo Juda gin ducu ma yam kwogi ocuŋ i kome, cam ducu ma kwogi jeŋŋe iye, ki pii bene ma kwogi ojeŋŋe iye.

² Tye ka kwanyo dano matek dok ma lamony, laŋolkop ki lanebi, latyet ki ladit,

³ lutel wi jo pyerabic ki jo me awora, lumi-tam ki lutak maryekke, ki luryeko ma gitiyo Lwit me gwoko kom.

⁴ Abimiyo awobe bedo rwodigi, litino matino aye ma biloyogi.

⁵ Dano gibibedo ka unne kekengi, kun ŋat man uno lawote, dano acel acel uno wadigi; awobi binywaro ladit, laboŋ ata binywaro dano ma giworo.

⁶ I nino meno dano bimako ominne i ot pa wonne, biwacci, “In it ye ki boŋo me aruka, in aye doŋ ibibedo ka loyowa, wi obur man bibedo i te locci.”

⁷ I nino meno en bilok kun wacci, “An gira pe abibedo lacan-dano; kwon ki boŋo pe i oda; pe wubiketa me bedo ŋat ma loyo lwak.”

⁸ Pien Jerucalem doŋ cok poto woko, Juda doŋ opoto mere woko; pien lok ma giloko ki gin ma gitimo kemo Rwot, gujemo woko i kome dok gubalo deyone woko,

⁹ Kitgi ma giyeko kwede kin dano-ni bibedo caden i komgi; ginyuto balgi woko ka maleŋ calo Codom, pe gikano akana, Can i wigi! Pien gin aye ma gukelo can i komgi kengi.

¹⁰ Wutit bot jo ma kitgi atir ni gibibedo maber, pien gibilimo bakacic me gin ma gitimo.

¹¹ Can bipoto i kom jo maraco! Can ma bipoto i komgi bibedo marac mukato kare; pien gin ma ciŋgi otimo, en aye bene ma gibitimo i komgi.

¹² Litino gitye ka uno lwakka, kombeddi doŋ gitye i te loc pa mon. Wun lwakka, lutelwu tye ka rwenyowu arwenya, gitye ka ŋakowu woko ki i yo ma myero wuwot iye.

¹³ Rwot doŋ obino woko ka pido, en ocuŋ ka ŋolo kop I kom lwakke.

¹⁴ Rwot doŋ oyabo pido woko i kom lwakke, ocako pido ki ludoŋo pa lwakke ki rwodigi. “Wun kikomwu aye ma wucamo poto olok, jami ma wuyako ki bot lucan tye i odiwu.

¹⁵ Wuninyo lwakka woko kono piŋo kun wutimo lucan malit mukato?” Man lok pa Rwot Lubaŋa me mony kikome.

Ŋolo kop i kom jo Cion

¹⁶ Rwot owacci, “Pien anyira me Cion giwakke, giwoto ma gutono ŋutgi atona kun gineno dano ki waŋ me kwele, ginyedo wot anyeda ki wi tyengi kun gara ma i tyengi yeŋŋe, tye ka kok maloŋo;

¹⁷ pi meno, Rwot bimiyo wi anyira Cion tokke woko doko bur Rwot bimiyo komgi bene doŋ noŋo ka maleŋ.

¹⁸ I nino meno Rwot bikwanyo atego me tyen monwu mabeco-ni woko ki tiko ma girubo me tur nyimgi, ki mola me cal dwe;

¹⁹ mola ŋut ma ryeny aryenya, atego ŋut cin, ki kitambara me adwala i ŋut;

²⁰ boŋŋigi me atweya i wic, ogul me bad, del me tweyo pyer, cupa moo me wir, lwit ma gitweyo e gwoko kom;

²¹ agit ciŋ, agit ma girwako lum;

²² boŋŋigi mabeco ma giruko i nino madito, gomci, boŋŋi me ummegi, ki kicaa me ciŋ;

²³ ginaruka mogo ma mareprep, boŋŋi camanini kitambara ma gidwalo i wic ki kitam: bara me geŋo waŋ.

²⁴ Ma ka moo ma ŋwece kur bibedo gin mukwok; ma ka del me tweyo pyer bibedo tol: ma ka yer ma gikedo akeda maber wigi bital woko; ma ka ruko boŋŋi mogo me wel, gibitweyo boŋo cola aye i pyergi; ma ka nen mwonya, gibibedo ki lewic.

²⁵ Gibineko cogwu woko ki pala I ucwan, co ma gin oteka lwenywu gibito imony.

²⁶ Kumo ki koko me can biwinnye i dogcel me Cion; bibedo calo dako ma giyako jamine woko ducu, ma obedo piny i nom.