Icaya 29 - Acoli Baibul

Giketo can i kom Juda ki time kica

¹ Ariel doŋ oneno can ma rom mene? Ariel ma en aye gaŋ ma onoŋo Daudi oguro kemane iye-ni, Wuwek mwaka koŋ okat aryo nyo adek mo, kun wubedo ka kwero nino madito mapatpat i karegi kikome.

² Ento abimiyo Ariel neno can; koko ki kumo bibedo tye iye, bibedo calo keno me waŋo gitum awaŋa,

³ Abiguro kemana i ŋeti kun arumi woko dyere, abirumi woko ki lubele ma gucudo malo likuŋ, abitoro lobo abako i nyimi calo cel.

⁴ Abidwoki piny i te lobo, ibilok ki piny i apwa, dwani bidonyo i te lobo calo dwanjok, ki lokki biwinnye liwewe kun donyo kwede i apwa.

⁵ Ento lukworri bibedo mapol calo apwa, ki jo ma kica pe i cwinygi bibedo calo cuŋ kai ma yamo tero. Dok cutcut i kare meno,

⁶ Rwot me mony bilimi, kun miyo kot mor mwoc atata, oyeŋyeŋ bedo tye ki woo bene bedo dit, ki yamo lapiru, yamo kot, kacel ki mac mager twatwal.

⁷ Lwak mony me rok mapatpat mubakke lipim ma lwenyo i kom jo Ariel, jo ducu ma gilwenyo i komgi ki i komkabedo matek me kalarregi, ma unogi, gin ducu gibidoko calo lek, gin ma Lubaŋa nyuto dyewor.

⁸ Kit macalo dano ma kec neko leko ni etye ka cam, ci cutcut co woko ma noŋo iye noŋo, nyo macalo dano ma orwo pii oketo leko ni etye ka mato pii, cutcut co woko ma noŋo orwo pii doŋ okete matek, kun mito mato pii; lwak rok ducu ma lwenyo i kom got Cion bene, gibibedo kit meno.

To waŋ Luicrael ki gobagi

⁹ Wubaŋŋe giwu kekenwu wek wubed lumiŋ, wubal waŋwu woko kekenwu wek wubed lutowaŋ! Wumer, laboŋo mato koŋo vino mo; wupaŋŋe apaŋa ki wot laboŋo koŋo mo ma wumato!

¹⁰ Pien Rwot doŋ oonyo i komwu cwiny me nino matek; omiyo waŋwu woko, ma gin aye lunebiwu; ki wiwu bene oumo woko ma gin aye jo ma neno piny.

¹¹ Gin ma Lubaŋa nyuto bot lunebi ducu doŋ odoko calo buk ma gimwono doge woko ki tuŋ botwu, ma ka gimiyo bot dano mo ma ŋeyo kwan kun giwacce ni, “Bin ikwan man,” ci en gamo ni, “Pe atwero kwanone pien gimwono doge woko.”

¹² Dok bene ka gimiyo bot ŋat ma kwiya kwan, kun giwacce ni, “Bin ikwan man,” en gamo ni, “Pe aŋeyo kwan.”

¹³ Ka doŋ Rwot owaco ni, “Rok man kara ginyiko cok kweda ki doggi noŋo, giketo deyo i koma bene ki doggi noŋo, cwinygi pe tye i koma wacel, lworo ma gilwora kwede-ni meno cik pa dano ma gipwonyogi kwede.

¹⁴ Pi meno, dok abitimo gin me aura i kom rok man, gin me aura dok me tano twatwal; mamiyo ryeko rwenyo woko bot jo maryek, ki ŋec pa jo megi ma giniaŋ matut bikanne woko.”

¹⁵ Jo ma kano tamgi woko ki bot Rwot ka matut, jo ma tiyo ticgi ka macol, jo meno bineno can, dok ma giwaco ni, “Aŋa kono ma nenowa? Aŋa kono ma neyowa?”

¹⁶ Koŋ wunen kit ma wun wuloko kwede kiloŋ! Gitwero poro lacwe-agulu ki lobo agulu ma en cweyo? Gin ma gitiyo atiya twero waco ki ŋat ma ocweye ni, “Pe in aye ma icweya”? Nyo gin ma gicweyo twero waco ki ŋat ma ocweye ni, “In pe iŋeyo gin mo?”

Laro jo Icrael

¹⁷ Odoŋ kare manok twatwal Lebanon bidoko poto ma ceko cam mabup mada, kun poto ma yam ceko cam mabup twatwal-li doŋ olokke odoko buŋa,

¹⁸ I nino meno jo ma itgi odiŋ gibiwinyo lok ma gikwano ki i buk, lutowaŋ bene waŋgi biyabbe, kun gia woko ki i mutu ki colpiny,

¹⁹ Jo mamwol dok gibinoŋo yomcwiny i Rwot, lucan bene gibibedo ki yomcwiny i ŋat Maleŋ me Icrael.

²⁰ Pien jo ma pe ki kica doŋ bibedo pe, jo ma gin luŋala bene gibitum woko, lulib dano dyewor me timo tim maraco gibityekogi woko liweŋ,

²¹ ki jo ma miyo kop loyo dano pi lokgi, ma giciko owic pi ŋat ma jukogi i kabedo me ŋolo kop, ma gicwalo ŋat ma kite atir woko pi lok mogo ma tere pe.

²² Meno omiyo Rwot, ma yam olaro Abraim, oloko lok i kom ot pa Yakobo ni, “Lewic pe dok bimako Yakobo, waŋe bene pe dok biballe.

²³ Pien ka en bineno litinone, ma gin aye tic ma an atiyo ki ciŋa, kun gitye bote, gibimiyo nyiŋa bedo me awora; gibiŋeyo atir ni ŋat Maleŋ pa Yakobo gire leŋ, gibibedo ki lworo i kom Lubaŋa me Icrael.

²⁴ Jo ma ŋak woko ki i cwinygi biniaŋ, ki jo ma bedo ka ŋur aŋura bene biye ni gipwonygi.”