Icaya 28 - Acoli Baibul

Rwot ociko lutel me lobo Epraim

¹ Tok me wakke pa lumero me lobo Epraim bineno can, kacel ki ature me deyone mamwonya mada, ma en aye deyo ma ner woko, ma tye malo i ŋet nota ma ceko twatwal, ma obedo pa jo ma koŋo vino doŋ oloyogi woko.

² Nen, Rwot tye ki dano mo matek ma tye ki twero; macalo yamo kot ma kotte tye ka cwer ki pee, yamo ma balo piny woko abala, dok macalo yamo kot madit twatwal, ma piine mol lak woko ata, en bireto dano woko piny ki tek kit meno.

³ Tok me wakke pa lumero me lobo Epraim gibinyono woko piny ki tyen;

⁴ ki ature me deyone mamwonya mada-ni, ma en aye deyo ma ner woko, ma tye malo i ŋet kufu ma ceko cam twatwal bibedo ma rom aroma ki nyig oduro mukwoŋo cek, ma ŋolo kare me oro peya oo; dano ka oneno, ruyo camone oyotoyot tekke ka oo i ciŋe,

⁵ I nino meno Rwot me mony bibedo macalo deyo, ki lalukana maber twatwal, bot jone ma gudoŋ;

⁶ en aye bibedo cwiny me ŋolo kop atir bot gat ma ŋolo kop, dok bibedo tek pa ŋat ma juko lweny i, dogcel me gaŋ.

Rwot ociko lutel me lobo Juda

⁷ Jo man bene doŋ gipaŋŋe apaŋa ki wot ki koŋo vino ma gumato, gitagge ki wot pien gumato koŋo vino makec mada; ajwagi ki lunebi gipaŋŋe ki wot pi mato koŋo mogo makec twatwal, koŋo vino ma gumato-ni doŋ obalo wigi woko, gipaŋŋe doŋ apaŋa pi mato koŋo mogo makec twatwal. Wigij doŋ pe mako ginanyuta ma Lubaŋa tye ka nyuto botgi maber, pe giŋolo kop kakare;

⁸ pien wi meja ducu ŋolo opoŋ ki nok keken, pe tye kabedo mo ma gin mo marac pe iye.

⁹ “En bipwonyo aŋa doki? En dok bitito lokke bot aŋa? Bot litino ma pud gigenogi dot agena bo? Bot jo ma pud gikwanyo doggi akwanya ki i dog tuno bo?

¹⁰ Lokke ducu tere pe, pe waniaŋ lokke; en temo pwonyowa nukuta ki nukuta, iwinyo kany acel, dok iwinyo kuca acel.”

¹¹ Adada, Rwot doŋ bilok ki jo magi, ki leb pa jo ma dumo aduma, ki leb pa jo ma gin welo;

¹² ma yam guwaco botgi ni, “Man aye yweyo; wumi yweyo bot ŋat muol, kun en tye kany”; ento gin gigi gukwero winyo lokke woko.

¹³ Meno bimiyo lok pa Rwot doko gin ma tere pe botgi, pe gibiniaŋ lokke; bibedo macalo en opwonyogi nukuta ki nukuta, ma giwinyo kany acel, dok giwinyo kuca acel. Wek gin gudok gupot woko ki yo ŋegi, gutur woko, ka gieikgi ki owic gimakgi woko.

¹⁴ Pi meno wuwiny lok pa Rwot, wun luŋala, ma wutye ka loyo rok man i Jerucalem!

¹⁵ Pien wuwaco ni, “Doŋ watyeko cikke woko ki to, dok bene doŋ waporo lok woko kacel ki lyel; ka ce can madit twatwal owok ki i kinwa, pe bigudo komwa, gire; pien doŋ wa-loko goba odoko kalarrewa, wakanne woko i lok ma pe ada”;

¹⁶ pi meno omiyo Rwot Lubaŋa owacci, “Nen, doŋ aketo got me wel i Cion got ma gitemo ma okatti woko doŋ maber, ma en aye bibedo acakki me te guti: ŋat ma ye pe bibedo ki lworo mo ma baŋe woko.

¹⁷ Abiloko ŋolo kop atir doko tol me pimo ot, kun kit ma atir bedo birigi: pee bimolo kalarrewu ma opoŋ ki goba-ni woko, pii bene bipoŋ woko libyeny i kakannewu.”

¹⁸ Meno bimiyo cikkewu ma wucikke ki to tur woko, ki lok ma wuporo kacel ki lyel bene pe bicuŋ: dok ka can madit biwok kii kinwu, can meno bigoyowu wupwodde piny lirwat.

¹⁹ Kare ducu ma can meno biwok ki i kinwu, ci terowu woko, pien biwok dyeceŋ ki dyewor nino kinino; doŋ niaŋ i lok meno bikelo lworo madit twatwal.

²⁰ Pien bibedo rom ki dano ma otemo buto i kitanda macek, kun umme ki gium ma pe romme kadi ki acel.

²¹ Pien Rwot bia malo macalo yam koŋ otimo i wi got Perajim, akemo bimake kit macalo yam koŋ omake kwede i luŋ me Gibeon’ pi cobo ticce, ento ticce dok pat twatwal ba! Pi cobo ticce ento ticce weloba!

²² Kombeddi doŋ wuwek ŋala obedi, wek pegitwewu dok matek twatwal; pien awinyo ka Rwot Lubaŋa me mony ociko pi tyeko lobo woko ducu:

²³ Wucik itwu, wuwiny dwana; wuter itwu, wuwiny lokka.

²⁴ Ŋat ma puro potone wek eco iye kodi, bedo ka purone nakanaka ma pe giko purone? En bedo ka boto poto ki lokone nakanaka?

²⁵ Ka doŋ otyeko tenone, doŋ pe coyo iye toke, pito iye okwer, ka dok pito iye ŋano i tyeŋ ki tyen, ki cayiri bene pe pito kakare, ki ŋano matino i ŋet lak peto?

²⁶ Pien Lubaŋane pwonye maber, kun niaŋe bene maber kit ma myero en oti kwede.

²⁷ Toke mere pe gidino ki yat me dino bel, okwer bene pe giloro tyen gadigadi ki iye; toke gire giteno atena ki odoo, ento okwer gityero atyera ki kidi me tyerone.

²⁸ Kai kwon bene gidino adina, ento pe gidino matek twatwal ma gityero nyige woko. Kadi aguragura ywayo tyen gadigadi wok ki iye, pe tyero nyige gire.

²⁹ Man bene oa ki bot Rwot me mony, en Rwot ma giuro i miyo tam, ryekone dit ma pe wacce.