Icaya 27 - Acoli Baibul

Laro jo Icrael ki cokogi kacel

¹ I nino maca, Rwot biketo can i kom Leviatan, ma en aye twol ma ŋeyo paŋŋe twatwal me laro kwone; Rwot biketo can i kome ki twon pala lucwanne matek, mabit mada, dok bineko min kulu ma bedo i nam.

² I nino maca, Rwot biwacci, “Wuwer wer i kom poto olok ma yomocwiny,

³ ma an Rwot aye agwoko; dok aonyo pii iye kare ducu. Agwoko dyeceŋ ki dyewor, wek ŋat mo pe obal woko;

⁴ pe atye ki akemo. Ka kono nene okuto ki ocok tye iye, kono acito alwenyo kwedgi, ka awaŋogi woko ducu liweŋ.

⁵ Nyo ka ce gularo bota ni akonygi, myero gucikke me bedo kweda ki kuc, myero gucikke me bedo kweda ki kuc.”

⁶ I Kare ma bino anyim Yakobo bicomo lwite i ŋom, Icrael bituru, dok bicako lot, ci nyige bipono lobo ducu.

⁷ Rwot mono yam ojwero Icrael woko lirwatrwat kit ma gijwero ki lukworgi ma gujwerogi ca? Nyo onekogi woko bene kit macalo en oneko ki jo ma onekogi ca?

⁸ Ai Rwot, yam ipyem kwedgi, ka iryemogi woko, kun ikutogi ki yamo dogi me nyiko woko cen, i kare ma yamo me oro tye ka kodo.

⁹ Man bimiyo igonyo Yakobo woko ki i balle, dok man aye bibedo adwoggi me kwanyo balle: en biloko godi ducu me keno tyer doko calo gweŋ ma giodo woko mapwot, kun Acera ma jok ma dako nyo keno tyer me wano odok eceta pe dok tye mo ma ocuŋ,

¹⁰ Gaŋ me cel gogo doŋ giweko odoŋ obur, kabedone doŋ giweko odoŋ nono calo tim ata; roci dyaŋ gicamo lum kunnu, gibuto ki kunnu kun gijwero pot oboke woko ducu ki i jaŋ yadi.

¹¹ I kare ma jaŋ yadi doŋ otwo woko, ci gicako turone woko; mon toŋo woko me yen tedo. Pien gubedo rok ma pe niaŋ, Lubaŋa ma oketogi pe kica mo bimako i komgi wacel, Lubaŋa ma ocweyogi pe bitimogi maber.

¹² I kare maca Rwot bidino kal cakke ki i kulu Euprate o kwede wa i kulu me Ejipt; Rwot bicokowu woko kacel wun jo Icrael.

¹³ Dok bene i nino meno, gibikuto iye tum madit mada, ka doŋ bimiyo jo ma yam onoŋo gurwenyo woko i lobo Aciria, ki mukene ma onoŋo giryemogi gucito i lobo Ejipt, gibidwogo cen ka woro Rwot i wi got maleŋ, i Jerucalem.