Icaya 26 - Acoli Baibul

Wer ma nyuto kit ma dano geno kwede gwok pa Rwot

¹ I nino meno gibiwero wer man i lobo me Juda, ni, “Watye ki gag matek adada; Rwot aye omiyo larre tye, oketo celle oguro orumo piny woko.

² Wuyab dogcel woko, wek rok ma kitgi atir, ma gigenne, gudony iye.

³ Ŋat ma tamme tye i komi, imiyo bedo ki kuc me ada, pien noŋo geni.

⁴ Gen Rwot nakanaka, pien Rwot Lubaŋa aye ma bigwokowa kare ducu.

⁵ Pien doŋ odwoko woko piny jo ma yam gibedo i gag ma otiŋŋe i wi cere malo. En ocorogi oretogi woko piny i lobo, oretogi piny i apwa.

⁶ Dano doŋ onyonogi ki tyengi, tyen lucan, ki tyen jo ma piny obwoyogi.”

⁷ Yo pa dano ma kite atir obedo apyel, cere pe iye, yo-nu in aye ma iyubo.

⁸ Ai Rwot, wan wakuri i yo ma inyuto botwa i ŋolo koppi; cwinywa bene tye i kom nyigi, dok bene watamo piri twatwal.

⁹ Aparo piri dyewor, tipona ma tye iiya puk odiko con ka yenyi. Pien ka iŋolo kop ilobo, jo ma bedo iye pwonyo kit ma atir.

¹⁰ Dano marac kadi bed gitine gin maber, pe twero pwonnye me bedo dano ma kite atir; bedo mere ka timo tim mogo ma pe tye atir i lobo pa dano ma cwinygi atir, kun pe neno dit pa Rwot.

¹¹ Ai Rwot, badi tye otiŋŋe malo, ento lukworri pe gineno. Mi lewic omakgi, ai Rwot. Mi gunen kit ma imaro kwede joni; cwal doŋ mac ma iyubo pi jo macalo meno, wek otyekgi woko.

¹² Ai Rwot, ibimiyo wabedo ki kuc, pien ticwa ducu in aye ma itiyo piwa.

¹³ Ai Rwot Lubaŋawa, rwodi mukene ma pe in yam guloyowa, ento wan wabedo ka tuco nyiŋi keken.

¹⁴ Gin doŋ guto woko, pe dok gibibedo kwo! Doŋ gudoko tipo, pe dok gibitwero a malo! In icito ilimogi ci ityekogi woko, imiyo wi dano bene doŋ wil woko i komgi.

¹⁵ Ento doŋ imiyo rokwa onya, ai Rwot, in doŋ imiyo rokwa man onya; in aye ma imiyo dano guketo deyo i komi, imedo waŋ lobowa bene odoko malac.

¹⁶ Ai Rwot, wan wabedo ka legi i kare ma watye i can, i kare ma iketo can i komwa, wan wabedo ka yenyi.

¹⁷ Wabedo calo dako ma tye ka minne ki arem, kun twennye atwenya ki koko pi arem ma en tye kwede; wan bene yam wabedo kit meno i nyimi, ai Rwot.

¹⁸ Wan wabedo ka minne i arem, ento ka nywalo latin dano pe doŋ wanywalo gin mo. Pe tye loc mo ma wan waloyo pi lobowa, pe tye gin mo ma watiyo ci watyeko.

¹⁹ Joni ma yam doŋ guto woko, pud dok gibibedo kwo, komgi muto-ni dok bicer. Wun jo ma wubedo i apwa, wuco woko wek wuwer wer pi yomcwiny! Pien toyoni aye toyo me leŋo, pi meno ibimiyo toyo bedo tye i lobo pa jo ma yam doŋ guto woko.

²⁰ Wubin, wun jona, wudony i kicikawu, ka wulor doggola woko; koŋ wukanne kunnu PI kare mo manoknok, nio waŋ ma akemo pa Rwot doŋ okato.

²¹ Pien nen, Rwot tye ka bino kun a ki i kabedone pi keto can i kom jo ma bedo i lobo pi balgi; remo ma doŋ oo i lobo binen woko ka maleŋ, lobo bene pe doŋ biumo kom jo muto.