Icaya 24 - Acoli Baibul

Rwot biketo can i kom, jo ma bedo i lobo

¹ Nen, Rwot biweko lobo doŋ nono, bimiyo doko obur, dok en biloko lobo bedo okani, ci keyo dano woko me bedo iye.

² I Kare meno can ma opoto i kom ajwaka bibedo rom ki can ma opoto i kom dano ata; can ma opoto i kom opii bedo rom ki can ma opoto i kom laditte; can pa aŋeca bene bedo rom ki can pa min ot ma en tiyo bote; can pa lacat-wil bibedo rom ki can pa lawil-wil; can pa lami-banya bibedo rom ki can pa laden-banya; can pa ŋat ma pido banya bedo rom ki pa ŋat ma tye ki banya.

³ Lobo bidoŋ nono laboŋo gin mo, kun noŋo giyako jami ma tye iye woko ducu; pien man lok pa Rwot kikome.

⁴ Lobo tye ka kumo, tekone bene orwenyo woko, wi lobo ducu piny oballe woko, teko pa lobo orwenyo woko, polo ducu doŋ onyoŋŋe woko.

⁵ Lobo doŋ oballe gire woko i nyim Lubaŋa, pi jo ma bedo iye; pien dano doŋ guturo cik pa Lubaŋa woko, pe gulubo gin ma yam en ociko, guturo bene wa gicikke ma ri nakanaka-ni woko.

⁶ Meno omiyo Lubaŋa oceno lobo woko, jo ma bedo iye gitye ka neno can iye pi balgi; meno en gin mumiyo jo ma i lobo tye ka waŋ, jo manoknok keken aye gudoŋ,

⁷ Koŋo vino bene tye ka kumo, olok kikome bene doŋ oballe woko, jo ducu ma cwinygi yom tye ka cur acura.

⁸ Ajaa agoya ma kok maloŋo pi yomo cwiny dano doŋ oliŋ woko, woo pa jo ma daŋŋe ki yomcwiny madwoŋ doŋ olin woko, yomcwiny mo ma miyo dano goyo opuk bene doŋ pe.

⁹ Dano pe dok mato koŋo vino ki wer i doggikit ma yam con; lumat koŋo doŋ noŋo koŋo kec i doggi marac.

¹⁰ Jami ma i gaŋ ducu doŋ onyobbe woko, odi ducu ma tye iye giloro doggi woko wek dano pe gudony iye.

¹¹ Dano tye ka daŋŋe ki koko pi koŋo vino ma doŋ orwenyo woko; kit yomcwiny ma yam gitye kwede doŋ ogik woko, yomcwiny mo doŋ pe i lobo.

¹² Gaŋ doŋ giweko odoko obur, dog cel bene gituro, ci giŋidowoko matitino.

¹³ Bitimme kit meno i kin lurok ma gibedo i wi lobo, bibedo calo yaa ma doŋ gipwono nyige woko, nyo macalo olok ma doŋ gikoro nyige woko.

¹⁴ Dano ilo dwangi malo kun giwero wer me yomcwiny; woo ma gidaŋŋe kwede pi dit pa Rwot winnye wa yo tuŋ potoceŋ.

¹⁵ Pi meno wun jo ma wutye wokceŋ, wumi deyo bot Rwot; ki wun jo ma wubedo i dog nam, wumi deyo i nyiŋ Rwot me Icrael.

¹⁶ Cakke ki i agikki piny wawinyo dano giwero wer me pako Rwot, ŋat Maleŋ deyone dit rom mene! Ento an agamo ni, “Ajony likon, ajony likoŋ, can i wiya gira! Pien jo ma luroro doŋ gutany woko ki lok rorogi i kom dano, pi lok rorogi-ni omiyo gidoto dano marac twatwal.”

¹⁷ Lworo ki bur, ki owic, bimakowu, wun jo ma wubedo i lobo,

¹⁸ ŋat ma oriŋo woo ma bikelo lworo, bipoto woko i bur; ka ce okatti woko kii bur, ci bimoko i owic. Pien polo doŋ oyabbe woko, acakki me te lobo bene, tye ka yeŋŋe.

¹⁹ Lobo doŋ oballe woko, lobo doŋ obar woko i dyere, lobo oyeŋŋe matek twatwal.

²⁰ Lobo doŋ tagge calo lamero koŋo, yeŋŋe calo ot aduc; balle doŋ dwoŋ, onure woko, orette woko piny ma pe dok twero a malo.

²¹ I kare meno Rwot biketo can i kom mony me polo, ki i polo kunnu, ki i lobo kany, i kom luker me lobo.

²² Gin ducu gibidoko lumabuc, ka gicokogi woko kacel i but; gibiloro wigi woko i ot mabuc, ka doŋ gicako keto can i komgi ma noŋo doŋ koŋ kare okato malac.

²³ Olee bitwodo dwe woko, lewic bene bimako cen; pien Rwot me mony aye bibedo kabaka i wi Cion, ki i Jerucalem, binyuto deyone i nyim ludoŋone.