Icaya 22 - Acoli Baibul

Lok ma lanebi Icaya otito i kom luŋ ma Lubaŋa onyutte iye lanyut mogo

¹ Man lok ma pire tek ma gitito i kom luŋ ma Lubaŋa onyuto iye ginanyuta mogo bot Icaya. Aŋo ma dok otimme ma wun ducu wutye malo i wi odiwu?

² Piŋo dano ma i gaŋ ducu gitye ka daŋŋe ki woo, ma wuwoto wuŋatte aŋata ki yomcwiny? Joni ma gineko i lweny ca, pe ginekogi ki pala lucwan, pe bene ginekog i i lweny kadi ki acel.

³ Lulocci ducu onoŋo doŋ guriŋo woko kacel, giŋuko makogi woko ma peya gulwenyo. Jo ducu ma ginoŋogi gimakogi woko, kadi bed jo mogo i kingi guriŋo ka mabor twatwal.

⁴ Mumiyo awaco ni, “Wulok waŋwu cen, pe myerowunena, wuwek akok matek pi cwercwiny ma atye kwede. Ŋat mo pe oyelle ka kweyo cwinya, pien jona ma ginekogi pol twatwal.”

⁵ Pien Rwot Lubaŋa me mony tye ki ninone, ma ninone obedo nino me woo, ki me nyono dano woko piny, ki nino me baŋo dano ducu i luŋ ma yam en onyuto iye ginanyuta mogo, ma en aye bene nino me muko cel gaŋ woko dok dano gibiwo iye atata i kin godi.

⁶ Mony mua ki i Elam guŋabo juru aterogi doŋ aŋaba, ki mony mua ki i Aram gutweyo aguraguragi i kom gadigadi, kun mony mua ki i Kir doŋ gitye ma guterre woko ki kwodigi.

⁷ Notawu mabeco-gu gupoŋ ki gadigadi lweny keken, dok wegi aguragura gitye gucuŋ woko i dogcel me gaŋ.

⁸ Gin ma yam jo Juda gigeŋo ki komgi doŋ orwenyo woko. I nino meno wuneno jami lweny ma tye i ot me Buŋa.

⁹ Wuneno kit ma gimuko kwede cel me gaŋ pa Daudi, dok wunoŋo yo bene me guro pii ma tye piny i ŋom i joro.

¹⁰ Wukwano odi ducu ki i Jerucalem, ka wureto odi mogo woko piny wek wunon gweŋ me gero cel matek,

¹¹ wukwinyo bene joro me pii i kin cel aryo me jolo pii me joro macon. Ento yam koŋ noŋo pe wutamo pi Lubaŋa ma oyubo lok-ki con, dok ma omiyo otimme kit meno-ni.

¹² I nino meno Rwot Lubaŋa me mony onoŋo tye ka lwonowu, me bino ka koko ki ka kumo, me bino ka lyelo yer wiwu ki ka ruko boŋo cola.

¹³ Koŋ wunen kit ma wunyero kwede ki yomcwiny, wuneko twoni dyaŋi ki romi ma pe wacce, wucamo riŋo dok wumato koŋo vino jwi. Wuwaco ni, “Wek wacamu cam, dok wamatu mat bene, pien diki wabito woko.”

¹⁴ Rwot me mony onyutte kene bota kun waco ni, “Adada, pe gibitimo kica botgi pi bal man, nio waŋ ma guto.” Man lok ma Rwot Lubaŋa me mony aye owaco.

Gitito ki Cebna ni Eliakim aye ma bileyo kakare

¹⁵ Rwot Lubaŋa me mony owaco ni, “Bin icit bot Cebna, lakan-jami, ma en aye lalo jami ma i ot pa kabaka, cit ipenye ni,

¹⁶ “Tic aŋo ma itiyo kany? Dok aŋa ma tye boti kany, ma omiyo it ye ka golo bur lyelli kekeni-ni? Piŋo kono itoŋo lyelli kekeni i wi got malo?

¹⁷ Nen, Rwot bikwanyi ki tek boli woko cen, kadi bed onoŋo nene ibedo dano mo matek twatwal. En bimaki woko matek Iikin,

¹⁸ en biluni woko aduno calo odi lo ci boli woko cen i lobo mo malac mada. Ibito kunnu, i ŋet gadigadini ma onoŋo inyatte kwede twatwal-li, in giri ma ikelo lewic i ot pa laditti.

¹⁹ Abikwanyi woko ki i dog ticci, ci adwoki woko cen i rwom mapiny.

²⁰ “I nino meno ka man doŋ otimme, abilwono laticca Eliakim wod pa Ilkia,

²¹ ci abimiyo en aye ruko boŋŋini me tic, ki del me tweyo pyer, ki kitambara me tweyo wic; tweroni ducu abidwoko i cine, En bibedo calo wego bot jo Jerucalem ki jo Juda,

²² Abimiyo twero ducu me ot pa Daudi bedo i wiye. Abimiye layab me loro doggola, ma ka en oloro, ci ŋat mo pe dok twero yabone; dok ka oyabo, ŋat mo pe twero lorone.

²³ Abimiyo en bedo tek calo teke ma giguro matek, jo me ot pa wonne ducu binoŋo deyo pire.

²⁴ “Jo me ot pa wonne ki wadine ducu bibedo ter mapek twatwal i wiye. Gin ducu gibinabbe i kome calo kikopo ki cupa ma giŋabo malo.

²⁵ Ka man bitimme i nino meno, ci teke ma yam giguro matek-ki biyogge woko doko logologo poto woko piny, Meno aye bibedo agikki pa jami ducu ma yam guŋabbe i kome. Man lok ma Rwot doŋ otyeko waco.”